Дәрігерлердің салғырттығы науқастың өміріне қауіп төндірді

7 қараша 2025, 10:10

2 521

Шу аудандық ауруханасына дертіне шипа іздеп келген Шолпан Ырысалиева дәрігерлердің салғырттығынан ауыр жарақат алғанын айтып, шағымданды. Облыстық мәслихаттың экс-депутаты “ауру үстіне ауру жамылдым” дейді. Бұл туралы Opennews.kz ақпарат агенттігі 31-арнаның “Информбюро” бағдарламасына сілтеме жасап хабарлайды.

Науқастың айтуынша, желке тұсындағы ісікті көрген дәрігерлер нақты тексермей, жобалап диагноз қойып, бірден ота жасауға шешім қабылдаған.

“Бір рет түсе алмады, екінші рет түсе алмады, үшінші рет тағы түсе алмады. 4-шіде қан қысымым көтеріліп, жағдайым нашарлағаннан кейін Байжановтың өзі айтты маған: ‘Сізді мен тірі алып қалдым ғой, 4-ші рет жасайын деп жатқанда тоқтатыңдар, өліп қалады деп салдырмай қойдым’, – деді”, – дейді Шолпан Ырысалиева.

Алайда ота жасалмай, тек наркоз алған науқас палатаға жатқызылған. Дәрінің әсері басылған соң, Шолпанның жағдайы күрт нашарлап, қатты қиналған. Кейін белгілі болғандай, анестезиолог ұйықтататын дәріні салу кезінде тамағын жарақаттап алған.

Бұл жайтты Шу аудандық ауруханасының бас дәрігері Жайдар Айтишев те растады. Айтишевтің айтуынша, екі медицина қызметкері қатаң сөгіс алған.

“Мойынды шалқайтып жасаған кезде кеңірдек көрінуі керек. Сол сәтте анестезиолог кеңірдекке түсе алмаған. Бұл – анестезиолог-реаниматологтың жіберген қателігі. Сонымен қатар, науқасты алдын ала толық қарап, тәуекелдерді анықтау қажет еді”, – деді бас дәрігер.

Жарақат салдарынан 57 жастағы әйел бір ай бойы ас іше алмаған. Жұтқыншағы іріңдей бастаған соң ол жеке емханаға жүгініп, кейін облыс орталығында тексеруден өткен. Сонда ғана дәрігерлер бұрын қойылған диагноздың қате екенін анықтаған – Шолпан Ырысалиева қатерлі ісікке шалдыққан болып шықты.

“Мынаның бәрін жыртып тастаған ғой. Бір ай бойы бетім ісіп, адам қатарына қосыла алмадым. Маған қиянат жасады, бірақ менің орнымдағы басқа азаматшалар осылай қиналмасын деймін. Бұл – сабақ болсын”, – дейді ол.

Қазір науқас қатерлі ісікті емдеу үшін облыс орталығында ем қабылдамақ. Ал оқиға бойынша медициналық бақылау органдары тексеріс жүргізеді деп күтілуде.