Қазақстанда БҰҰ жол қауіпсіздігі бойынша халықаралық науқан бастады

8 сәуір 2026, 09:30

2 510

Қазақстан Біріккен Ұлттар Ұйымының #MakeASafetyStatement жаһандық ақпараттық науқанына қосылды, - деп хабарлайды Opennews.kz ақпарат агенттігі kaz.inform.kz сайтына сілтеме жасап.

2026 жылғы 3 сәуірден бастап Астана және Алматы қалаларында RTSDecaux компаниясының жарнамалық нысандарында науқан материалдары орналастырылған. Науқанға Новак Джокович, Жан Рено, Майкл Фассбендер және Мишель Йео сияқты әлемге танымал тұлғалар қатысып, жол қауіпсіздігі бойынша негізгі хабарламаларды кең аудиторияға жеткізуде. Жоба әлемнің 80-нен астам елін және 1000-нан астам қаласын қамтыған. Қазақстан бұл бастамаға қосылу арқылы жол қауіпсіздігін ілгерілетуге бағытталған ауқымды халықаралық күш-жігердің бір бөлігіне айналды.

Науқан БҰҰ Бас хатшысының жол қауіпсіздігі жөніндегі Арнайы өкілінің кеңсесі, JCDecaux және Saatchi & Saatchi серіктестігімен жүзеге асырылуда. Ол қоғам қайраткерлерін, шешім қабылдаушыларды және пікір көшбасшыларын жол қауіпсіздігі бойынша жеке жауапкершілік алуға шақырады. Сонымен қатар қарапайым әрі ғылыми дәлелдерге негізделген мінез-құлық үлгілерін насихаттайды.

"Жол-көлік оқиғалары — бұл бүкіл әлемдегі «үнсіз пандемия», ал Қазақстанда олар жыл сайын 2000-нан астам адамның өмірін қиып, мыңдаған отбасы мен қоғамға әсер етіп жатыр. Өлім-жітім деңгейінің төмендеуі және қауіпсіздік белдіктерін міндетті пайдалану сияқты оң өзгерістерге қарамастан, жылдамдықты асыру және мас күйінде көлік жүргізу сияқты мәселелер әлі бар. Қозғалыс қарқыны артқан сайын, жол қауіпсіздігін қамтамасыз ету үшін тұрақты күш-жігер қажет," — деді Жан Тодт.

"Жол қозғалысы қауіпсіздігі — тек көлік мәселесі ғана емес, бұл қоғамдық денсаулық, тұрақты даму және адам өмірін сақтау мәселесі. Жолдағы әрбір өлім мен ауыр жарақаттың алдын алуға болады. Осы науқан арқылы біз жауапкершілік, өзара құрмет және жүргізушілерді, жолаушыларды, жаяу жүргіншілер мен велосипедшілерді қорғауға бағытталған қарапайым, өмірді сақтайтын шешімдер мәдениетін қалыптастыруға ұмтыламыз. Қазақстанда бұл сондай-ақ қоғамды қауіпсіз, инклюзивті және тұрақты мобильділік туралы кең ауқымды диалогқа тартуға мүмкіндік береді," — деп атап өтті Саранго Раднарагча.

Жол-көлік жарақаттары әлемде өзекті мәселе болып қалып отыр. Жыл сайын шамамен 1,19 миллион адам жол апаттарынан көз жұмады. Қазақстанда осы кезге дейін 36 146 жол-көлік оқиғасы тіркеліп, 1 796 адам қаза тапқан.

"Алматы және Астана қалаларында қоғамдық көлік аялдамаларының өз желісін пайдаланатын біздің компания, өкінішке қарай, жол-көлік оқиғаларымен үнемі бетпе-бет кездеседі. Сондықтан БҰҰ-ның #MakeASafetyStatement жаһандық науқанына қатысу біз үшін жай ғана ақпараттық қолдау емес, Қазақстан жолдарында жауапкершілік пен қауіпсіздік мәдениетін қалыптастыруға қосқан нақты үлес болып табылады. Сыртқы жарнама мүмкіндіктерін пайдалана отырып, біз миллиондаған адамдарға қарапайым, бірақ өмірді сақтайтын қауіпсіз мінез-құлық қағидаларын жеткізуді мақсат етеміз. Бұл қағидалар адам өмірін сақтауға және қалалық ортаны барлық жол қозғалысына қатысушылар үшін неғұрлым тұрақты әрі жайлы етуге ықпал етеді," — деп түйіндеді Арман Қағаров.

Науқанды қолдайтын тұлғалар қатарында Дидье Дрогба, Патрик Демпси, Шарль Леклер, Марк Маркес, Кайли Миноуг және Юссу Н’Дур бар. Жалпы алғанда, 16 әлемдік танымал тұлға мен Олимпиада чемпиондары науқанның хабарламаларын БҰҰ-ның алты ресми тілінде таратуда. Жоба 2030 жылға дейін жол-көлік оқиғаларынан болатын өлім мен жарақаттарды екі есеге қысқартуды көздейтін БҰҰ Жол қауіпсіздігі жөніндегі іс-қимыл онжылдығы мақсаттарына қол жеткізуге бағытталған.