Тоқаев Кипр президентіне І дәрежелі "Достық" орденін табыстады
2 514
Мемлекет басшысы Қасым-Жомарт Тоқаев Кипр президенті Николас Христодулидисті бірінші дәрежелі “Достық” орденімен марапаттады,- деп хабарлайды Оpennews.kz ақпарат агенттігі Stan.kz порталына сілтеме жасап.
Мемлекет басшысы Кипрдің Қазақстанның Еуропа Одағымен байланысын дамытуда әрдайым қолдау көрсетіп келе жатқанын айтқан.
“Осы уақыт ішінде екі ел арасындағы қарым-қатынас едәуір нығайды. Астана мен Никосияда елшіліктер ашылып, тұрақты байланыс орнатылды. Президент Никос Христодулидистің Қазақстанға жасаған алғашқы ресми сапары Ларнака мен Астана арасындағы алғашқы тікелей әуе рейсінің іске қосылуымен тұспа-тұс келіп отыр. Мұның символдық мәні ерекше. Біз мемлекеттеріміз арасындағы ынтымақтастықты одан әрі тереңдетуге ниеттіміз. Бұл екі халықтың да мүддесіне сай келеді”, – деді Тоқаев.
Президенттің айтуынша, Кипр басшысы екіжақты қатынастардың дамуына елеулі үлес қосып келеді.
“Мен мұны жоғары бағалаймын. Осыған байланысты бүгін Президент Никос Христодулидиске І дәрежелі "Достық" орденін табыстадым. Бұл марапат – қазақ халқының Сізге және Кипр жұртына деген ерекше құрметі мен шынайы ықыласының белгісі”, – деді мемлекет басшысы.
