RUB (-0.03) 8.24 KZT
USD (+1.53) 478.9 KZT
EUR (-0.40) 459.98 KZT
Қоғам
62

Түркістан облысында ер адам ауыл тұрғынына пышақпен шабуыл жасап, 4 млн теңгесін алып кетті

Сарыағаш ауданында белгісіз ер адам жергілікті тұрғынның үйіне кіріп, қарақшылық шабуыл жасаған. Жәбірленушінің айтуынша, күдікті пышақпен қорқытып, 4 млн теңгесін қолды етіпті. Бұл туралы Azattyq Ruhy Otyrar.kz-ке сілтеме жасап хабарлайды.

Күдікті ойындағысын іске асырған бойда оқиға орнынан бой тасалаған. Қазір облыстық ПД күдіктіні ұстап, оқиғаға қатысты тергеу амалдарын жүргізіп жатыр.

«Нақтырақ айтсақ, Сарыағаш аудандық полиция бөліміне пышақ жарақатын алған әйелдің ауруханаға түскені туралы хабарлама келді. Тексеру кезінде ауыл тұрғынының үйіне белгісіз біреу кіргені анықталды. Яғни, күдікті ер азамат әйелге физикалық күш көрсетіп, пышақпен қорқытқан. Содан жәбірленушіге пышақ жарақатын салып, ішінде ақшасы бар сөмкені алып кеткен. Аталған жайт ҚР ҚК-нің 192-бабы 3-бөлігі «Қарақшылық» бойынша тіркелді. Келтірілген шығын көлемі шамамен 4 миллион теңгеден асты», - дейді Түркістан облысы ПД Криминалдық полиция басқармасының бөлім бастығы Ақжол Оразов.

Айта кетейік, күдікті Нұр-Сұлтан қаласынан табылған. Қазіргі уақытта аталған жайт ҚР ҚК 192-бабы 3-бөлігі «Қарақшылық» және ҚР ҚК-нің 24-бабы 3-бөлігі, 99-бабы 2-бөлігі «Адам өлтіруге оқталу» бойынша сотқа дейінгі тергеу амалдары жүргізілуде. Күдікті қамауға алынды.