Қазақ бишілері Бейжіңде әлемдік сахнада өнер көрсетеді

Қазақ ұлттық хореография академиясының студенттері Бейжің би академиясының Dance Theatre сахнасында өтетін «Сұлулықпен үндестік: Би біліміндегі жаһандық тәжірибе алмасу» атты халықаралық көрсетілімге қатысады, - деп хабарлайды "Opennews.kz" ақпарат агенттігі.

Бұл халықаралық жобаны Бейжің би академиясы ұйымдастырып отыр. Іс-шара Би білімінің дүниежүзілік альянсының (World Dance Education Alliance) қолдауымен өтеді. Би форумына 38 мемлекеттен 70-тен астам жетекші хореографиялық оқу орны қатысады.

Қатаң іріктеу кезеңінен сүрінбей өткен Қазақ ұлттық хореография академиясының студенттері үздік қатысушылардың бірі атанып, Қазақстан атынан әлемдік сахнада өнер көрсету құрметіне ие болды.

Көрсетілім бағдарламасында П. И. Чайковскийдің «Ұйқыдағы ару» балетіндегі Аврора мен Дезиренің па-де-де нөмірі орындалады.