Соңғы 5 жылда кәсіпорындарда 200-ге жуық адам жарақат алды
2 523
Шығыс Қазақстан облысында соңғы 5 жылда тау-кен металлургия кәсіпорындарында 199 адам жарақат алған, - деп хабарлайды "Opennews.kz" ақпарат агенттігі.
Шығыс Қазақстан облысының прокуратурасы 2023 жылы тау-кен металлургия өнеркәсібінде апаттар мен жарақат алған жұмысшылар санын азайту мақсатында арнайы жобаны іске қосты. Себебі соңғы 5 жылда кәсіпорындарда 199 адам жарақат алғандықтан бұл өзекті мәселеге айналып отыр.
«Осы мақсатта мәселелерді үйлестіру және жедел шешу үшін жұмыс тобы құрылып, тау-кен металлургия кәсіпорындары басшыларының қатысуымен іс-шаралар кешені әзірленді. Жұмысшылар мен жұмыс берушілерді қолдау үшін сенім телефоны құрылды. Еңбек ұжымын жазатайым оқиғалардан сақтандыруды қамтамасыз ету, жұмыс орындарын уақтылы аттестациялау, қызметкерлерді төтенше жағдайларда алғашқы медициналық көмек көрсету дағдыларына оқыту, тозған жабдықты жаңарту бойынша шаралар қабылданды», - деп хабарлады ШҚО прокуратурасынан.
Осының нәтижесінде, 2023 жылы алдыңғы жылмен салыстырғанда зардап шеккендер саны 40,5%-ға азайды. Осы жылдың басынан бері тау-кен металлургия кәсіпорындарында өндірістік жарақат алу фактілері тіркелмеген.
