Жаңа жыл қарсаңында донорлық қанға сұраныс күрт артты
Жаңа жыл мерекесі кезінде ауруханаларда жұмыс тоқтамайды, ал науқастардың көпшілігі донорлық қанға тәуелді. Мереке күндері жол-көлік оқиғалары, тұрмыстық жарақаттар, шұғыл операциялар мен босану жағдайлары азаймайды, ал донорлар саны керісінше төмендейді, - деп хабарлайды "Opennews.kz" ақпарат агенттігі.
Осы себепті Жаңа жыл қарсаңында қанға деген сұраныс артады.
Медицина мамандары қанның жасанды жолмен өндірілмейтін, тек адамнан алынатын ерекше ресурс екенін айтады. Бір донордың қаны үш адамға дейін өмір сыйлауы мүмкін. Сондықтан елордадағы Қан орталығы мереке күндері де демалыссыз жұмыс істеп, тұрғындарды донор болуға шақырады.
Донор болу үшін 18 жасқа толған, салмағы 50 келіден асатын, денсаулығы жақсы азаматтар тегін әрі қауіпсіз медициналық тексеруден өтеді. Мамандардың айтуынша, донорлық тек өзгеге көмек қана емес, адамның өз денсаулығына да пайдалы.
Жаңа жыл қарсаңында жасалатын ең ізгі істердің бірі – донор болу. Бұл – адам өмірін сақтауға үлес қосатын баға жетпес сый.
