Альцгеймер ауруын анықтаудың жаңа тәсілі: саусақтан алынған қан жеткілікті болуы мүмкін
Сарапшылар Альцгеймер ауруын диагностикалау әдістерін түбегейлі өзгертуі мүмкін жаңа клиникалық зерттеудің басталғанын хабарлады. Ғалымдардың айтуынша, болашақта бұл ауруды анықтау үшін күрделі ми сканерлеуі немесе жұлын сұйықтығын инвазивті жолмен алу қажет болмауы мүмкін, - деп хабарлайды "Opennews.kz" ақпарат агенттігі.
Қазіргі таңда Альцгеймер диагнозын растау қымбат әрі күрделі медициналық процедураларды талап етеді. Ал жаңа әдіс саусақтан алынған қан үлгісі арқылы диагноз қоюға мүмкіндік беруді көздейді. Бұл тәсіл жылдам, қолжетімді және пациентке ауыртпалық түсірмейді.
Жаңа қан сынағын тікелей жалпы тәжірибелік дәрігердің кабинетінде өткізу жоспарланып отыр. Процедура аз уақыт алады және құны төмен, бұл Альцгеймер ауруын ерте кезеңде анықтауға жол ашады.
Сарапшылардың пікірінше, зерттеудің сәтті болуы тек Альцгеймер ауруының диагностикасын жақсартып қана қоймай, басқа да нейродегенеративті ауруларды ерте анықтауға мүмкіндік береді. Ерте диагностика аурудың дамуын баяулатуға және емнің тиімділігін арттыруға көмектесуі мүмкін.
Жаңа сынақ Альцгеймер ауруының дамуымен тікелей байланысты үш негізгі ақуызды анықтауға бағытталған. Bio-Hermes-002 деп аталатын клиникалық зерттеу Ұлыбритания, АҚШ және Канада сияқты бірнеше елде жүргізілуде. Зерттеуге барлығы 883 адамды тіркеу жоспарланған, олардың 360-тан астамы сынақтан өтіп үлгерген.
Зерттеуге дені сау адамдар, жеңіл когнитивті бұзылыстары бар тұлғалар, сондай-ақ Альцгеймер ауруының жеңіл және орташа түрімен ауыратын науқастар қатысуда.
Клиникалық сынақтарды LifeArc медициналық зерттеу ұйымы Ұлыбританияның Деменцияны зерттеу институтының қолдауымен және Альцгеймердің жаһандық платформасы қорымен бірлесіп жүргізіп жатыр. LifeArc өкілдері жобаның басты мақсаты — саусақтан алынған қан талдауы негізінде Альцгеймер ауруын дәл әрі сенімді диагностикалауға болатынын халықаралық деңгейде дәлелдеу екенін атап өтті.
