Қазақстаннан 130 шетелдік азамат қуылды

Елімізде «Мигрант» операциясы аясында бір апта ішінде 130 шетелдік азамат елден қуылған, деп хабарлайды Opennews.kz ақпарат агенттігі.



ІІМ ресми өкілі Шұғыла Тұрлыбектің айтуынша, 20 ақпаннан бастап елімізде шетелдіктердің көші-қон заңнамасын бұзушыларды анықтауға бағытталған «Мигрант» операциясы жүргізіліп жатыр.

Полицейлер шетелдіктердің тұрғылықты жерлерін, құрылыс нысандарын, базарларды, жатжұрттықтардың жалдамалы еңбегін пайдаланатын ұйымдар мен жұмыс берушілерді тексеріп жүр.

Бір апта ішінде көші-қон заңнамасын бұзған 6836 дерек анықталды. Оның ішінде 1814-і елде болу мерзімін бұзған, 1886 адам заңсыз еңбек еткен, 356 жұмыс беруші шетелдік жұмыс күшін заңсыз пайдаланғаны үшін әкімшілік жауапкершілікке тартылды, - деді Шұғыла Тұрлыбек.

Полицияны өздеріне келген шетелдіктер туралы уақтылы хабардар етпегені үшін 27 жеке және заңды тұлға тартылған.

Көші-қон заңнамасын бұзушыларды елден шығару туралы соттардың 514 шешімі шығарылды. Мәжбүрлі түрде 130 шетелдік елден қуылды. Енді олар Қазақстанға 5 жыл бойы кіре алмайды, - деп түсіндірді ол.