"Енді жүк те, жауапкершілік те депутаттарға түседі" - Ерлан Қошанов
Мәжіліс палатасының спикері Ерлан Қошанов депутаттардың түйіткілді, өзекті мәселелерді жақсы білетінін мәлім етті, - деп хабарлайды "Opennews.kz" ақпарат агенттігі.
Сөзінше, Мемлекет басшысының реформаларының нәтижесінде елдегі негізгі саяси институттың барлығы жаңғырды. Мәжіліс сайлауы сол жаңғырудың соңғы сатысы болды.
Мәжілісте алғаш рет 6 саяси партия және бірмандатты округтен сайланған депутаттар отыр. Біздің бағдарламаларымыз бен көзқарасымыз әртүрлі болғанымен елдің, мемлекеттің мүддесі мәселелеріне келгенде ойымыз да, міндетіміз де ортақ, - деп айтты Қошанов.
Мәжіліс спикері күн сайын Мәжіліс жұмысының қарқыны да, салмағы да арта түсетінін жеткізді.
Сонымен қатар Қошанов заң шығару мәселесіне де тоқталып өтті.
Негізгі жұмысымыз - сапалы және нақты жұмыс істейтін заңдар қабылдау. Президент Қасым-Жомарт Тоқаев осы шақырылымның бірінші сессиясында жаңа Парламенттің алдында тұрған міндеттердің ауқымдылығына тоқталған болатын. Соның ішінде Мемлекет басшысы еліміздің қарқынды дамуы үшін алдағы 5 жылда сапалы заңнамалық негіз жасауды тапсырды. Бұл үшін барлық алғышарт жасалған. Мәжіліске заң қабылдау өкілеттігі бүгінгі күні болығымен берілді. Енді жүк те, жауапкершілік те бізге түседі деген сөз, - деді ол.
Қошанов депутаттар үйлесімді, тиімді және жүйелі жұмыс істеуі керегін айтты.
Депутаттарда заң шығаруда бастамашыл болуға өкілеттігі бар. Осы мүмкіндікті де толығымен пайдалануымыз керек. Оның үстіне бәріміз өңірлерді аралап келдік. Көптеген депутат қызмет істеп, өңірлерден келді. Көптеген түйіткілді, өзекті мәселені жақсы білеміз деп айта аламын. Сондықтан депутаттар белсенділігін барынша арттырып, осы мәселелерді заңнамалық тұрғыда реттеуге атсалысады деп ойлаймын, - деді Қошанов.
Мәжіліс спикерінің сөзінше, палатадағы ашықтық мәселесі негізгі мәселе болып қала береді.
Біз осы бағыттан айнымаймыз. Мәжілісте ашық және жария түрде қызмет етуге барлық жағдай жасалған. Журналистерге сұқбат беріп, өзекті мәселелер бойынша пікір білдіріп отыру – бұл депутаттардың басты міндеттерінің бірі. Бұдан бөлек заңдарды талқылауға қоғам өкілдері мен тәуелсіз сарапшыларды шақыру да өте маңызды. Мәжілісте мәслихат арқылы өңірлердің де «үні» естілуі қажет, - деп түсіндірді палата төрағасы Мәжілістің жалпы отырысында.
Айтуынша, көп ұзамай қоғамдық палата да жұмысын бастайды. Қошанов ол қызу пікірталас алаңына айналатынын айтты.
Ел болашағына бей-жай қарамайтын барлық азаматқа, қоғамдық ұйымға есігіміз айқара ашық. Нағыз халықтық Парламент дегеніміз – менің ойымша осы, - деді ол.
Мәжілісте 50-ге жуық заң жобасы қаралып жатыр. Мемлекет басшысының тапсырмасы бойынша жуырда тағы да бірқатар заң жобасы Мәжіліске келіп түседі.
