Президент мемлекеттік басқару жүйесін жетілдіруге бағытталған заңдарға қол қойды
Мемлекет басшысы Қасым-Жомарт Тоқаев мемлекеттік басқару жүйесін жетілдіруге бағытталған заңдарға қол қойды, - деп хабарлайды "Opennews.kz" ақпарат агенттігі Ақордаға сілтеме жасап.
"Мемлекет басшысы "Қазақстан Республикасының кейбір конституциялық заңдарына Қазақстан Республикасындағы әкімшілік реформа мәселелері бойынша өзгерістер мен толықтырулар енгізу туралы" Қазақстан Республикасының Конституциялық заңына, сондай-ақ "Қазақстан Республикасының кейбір заңнамалық актілеріне Қазақстан Республикасындағы әкімшілік реформа мәселелері бойынша өзгерістер мен толықтырулар енгізу туралы" Қазақстан Республикасының Заңына қол қойды", - делінген Жарлықта.
Заңдар орталық мемлекеттік органдардың өкілеттерін орталықсыздандыру арқылы мемлекеттік басқару жүйесін жетілдіруге бағытталған.
"Атап айтқанда, Үкіметтің құрылымдық және инвестициялық саясатты іске асыру, мәдениетті, білім беруді, денсаулық сақтауды, туризмді және спортты дамыту жөніндегі мемлекеттік саясатты қалыптастыру, сондай-ақ премьер-министр кеңсесінің мемлекеттік аппаратқа қайта құрылуына байланысты құзыреті; т.б. алынып тасталады.
Заң орталық мемлекеттік органдардан жергілікті атқарушы органдарға жергілікті маңызы бар мәселелерді шешуге бағытталған 21 функцияны береді", - делінген Сенат сайтында.
