Қытайлық инвесторлар Батыс Қазақстан облысынан 100 га жер сұрап отыр

17 қараша 2023, 14:30

2 521

Олар аймақта ақбөкен етін өңдейтін зауыт ашпақшы, - деп хабарлайды "Opennews.kz" ақпарат агенттігі Adyrna.kz-ке сілтеме жасап.

Олар телімді жалға алу арқылы аймақта ақбөкен етін өңдейтін зауыт ашпақшы. Бұл туралы облыс әкімі Нариман Төреғалиев мәлімдеген.

Аймақ басшысы қытайлықтардың әкімдікке шамамен екі ай бұрын жүгінгенін мәлімдеді.

Шетелдіктер қазақстандық әріптестерімен бірге зауыт салуға ниет білдірді. Бұл кәсіпорын ақбөкен мен ірі қара мал етін толық өңдеуді жоспарлап отыр. Біз олардың ұсынысын тыңдап, өз шарттарымызды ортаға салдық. Компания аймақта тіркелуі керек, сәйкесінше барлық салық шегерімдері аймақ бюджетін толықтырады. Зауыт жергілікті тұрғындарды жұмыспен қамтуы керек. Инвесторлар өз міндеттемелерін орындауы тиіс. Әйтпесе, жер тәркіленеді. Шартқа келісіп, қаржы тапса, жерді береміз. Қорқатын ештеңе жоқ, олар жерге иелік ете алмайды, қайта сата алмайды. Біз үшін өңірге инвестиция тарту – басты міндет, – деді Нариман Төреғалиев.

Әкім бұл мәселенің келіссөздер сатысында екенін атап өтті.

Бұған дейін қытайлық инвесторларға Ұлытау облысынан 20 мың гектар жер телімі бөлінгені айтылған еді. Қазан айында Sinohydro, ТехноГруппСервис компаниялары және Ұлытау облысының әкімдігі арасында үш жақты меморандумға қол қойылған. Рәсім барысында жоспарланған жобалардың 2060 жылға дейін Қазақстанда көмірқышқыл газының шығарындыларын азайтуға және көміртегі бейтараптығына қол жеткізуге бағытталғаны айтылды.