2 қыркүйекте Тоқаев Қазақстан халқына жолдау жасайды

29 тамыз 2024, 16:27

1 147

2 қыркүйекте мемлекет басшысы Қасым-Жомарт Тоқаев Қазақстан халқына жолдауын жариялайды, - деп хабарлайды "Opennews.kz" ақпарат агенттігі.

Ақорданың Telegram-дағы ресми арнасында жарияланған ақпарат бойынша, президент кезекті жолдауын парламент палаталарының бірлескен отырысында жасайды.

"Жиынға сенат пен мәжіліс депутаттары, орталық мемлекеттік органдардың басшылары, Ұлттық құрылтай, Адам құқықтары жөніндегі комиссия, Әйелдер істері және отбасылық-демографиялық саясат жөніндегі ұлттық комиссия мүшелері, қоғам өкілдері және еңбек ұжымдары қатысады", - делінген ресми хабарламада.

Президент жолдауында еліміздің саяси және әлеуметтік-экономикалық даму перспективаларына қатысты мәселелер қамтылады. Еске салсақ, бұған дейін мәжіліс төрағасы Ерлан Қошанов парламент палаталарының бірлескен отырысын шақыру туралы өкімге қол қойғанын жазған едік.

"Қазақстан Республикасы Конституциясының 58-бабы 4-тармағының 2) тармақшасына сәйкес, Қазақстан Республикасы парламенті палаталарының бірлескен отырысы 2024 жылғы 2 қыркүйекте сағат 11.00-де Астана қаласында шақырылсын", - деп жазылған өкім мәтінінде.

28 маусымда парламент палаталарының бірлескен отырысы өтіп, сегізінші сайланған Қазақстан Республикасы парламентінің екінші сессиясы жабық деп жарияланып, сенат және мәжіліс депутаттары каникулға кеткен еді.