Елімізде Оңтүстік Кореямен мұнай бойынша келіссөз өтеді
Оңтүстік Корея президенті әкімшілігінің басшысы Канг Хун Сик Қазақстанға іс сапармен келеді, - деп хабарлайды Opennews.kz ақпарат агенттігі Azattyq-ruhy.kz сайтына сілтеме жасап.
Оңтүстік Кореяның өкілі Канг Хун Сик Қазақстанға президент Ли Чжэ Мённің арнайы өкілі ретінде келіп, шикі мұнай өнімдерін жеткізу бойынша ұзақ мерзімді келісімшарттар жасауға ниет білдірді. Келіссөздер барысында ол үкімет өкілдерімен, мұнай компаниялары мен кеме операторларымен кездесу өткізіп, жанармай тасымалының балама бағыттарын қарастырады.
Оңтүстік Кореяның мұнай импортының 61%-ы дәстүрлі түрде Ормуз бұғазы арқылы жүзеге асады. Дегенмен Иранмен жалғасып келе жатқан қақтығыстар бұл бағытты күрделендірген. Иран «дұшпан» деп санайтын елдер үшін бұғаз арқылы өтуді шектеп, транзиттің қауіпсіздігіне шектеу қойған. Бұған дейін әлемдік мұнай саудасының шамамен 20%-ы осы маршрут арқылы жүргізілген.
Наурыз айында Сеул Біріккен Араб Әмірліктерінен 24 миллион баррель мұнай жеткізу туралы келісімге қол қойса да, қазір ел ұзақ мерзімді және тұрақты жеткізілімдерді қамтамасыз етуге басымдық беріп отыр. Ел ішінде энергияны үнемдеуге бағытталған шаралар қолға алынған - тұрғындар мен бизнес өкілдері отынды үнемдеуге шақырылуда. Энергетикалық дағдарыс Еуропа елдерін де қамтыған. Брюссельде кондиционерлердің температуралық режимін қатаңдату, қашықтан жұмыс істеуді ынталандыру, отынды нормалау және әуе рейстерін шектеу сияқты шаралар қарастырылуда. Наурыз айының басынан бері Еуропада бензин бағасы 70%-ға көтерілген.
