ҰҚК Мәсімовпен бірге тағы кімдер ұсталғанын хабарлады

ҰҚК-нің бұрынғы төрағасы Кәрім Мәсімовпен бірге тағы кімдер ұсталғаны белгілі болды. Бұл туралы ҰҚК баспасөз қызметі өкілі мәлімдеді, - деп хабарлайды Opennews.kz ақпарат агенттігі ҰҚК сайтына сілтеме жасап.

Ұлттық қауіпсіздік комитеті экс-төраға Кәрім Қажымқанұлы Мәсімовке қатысты мемлекетке опасыздық жасау дерегі бойынша сотқа дейінгі тергеуді жалғастырып жатыр.

Осы іс бойынша билікті күшпен басып алуға және лауазымдық өкілеттіктерін асыра пайдалануға бағытталған іс-әрекеттер дерегіне қатысты қосымша сотқа дейінгі тергеп-тексеру жұмыстары басталды.

Бұл қылмыстарды жасады деген күдікпен К.Мәсімовтен басқа ҰҚК төрағасының бұрынғы орынбасары - "А" арнайы мақсаттағы қызмет бастығы Әнуар Садықұлов пен ҰҚК төрағасының бұрынғы орынбасары Дәулет Ерғожин ұсталды. Ведомство өкілі тергеу жалғасатынын мәлімдеді.