Жалағаш ауданында бірлік пен келісім тақырыбында кездесу өтті

10 қазан 2025, 14:42

1 563

Бүгін Жалағаш ауданында «Еліміздің басты құндылығы – бірлік пен келісім» тақырыбында маңызды кездесу өтті. Іс-шараны облыстық Қазақстан халқы Ассамблеясы жанындағы ғылыми-сарапшылық топ ұйымдастырып, оған аудан тұрғындары, қоғамдық құрылымдардың өкілдері мен белсенді жастар қатысты, - деп хабарлайды "Opennews.kz" ақпарат агенттігі.

Кездесу этносаралық келісімді нығайту, қоғамдық тұрақтылықты сақтау және ұлттық бірегейлікті дәріптеу мақсатында өткізілді.

Кездесуге арнайы келген «Қоғамдық келісім» КММ директорының орынбасары, философия докторы (PhD) Дәулет Омаров пен Қорқыт Ата атындағы Қызылорда университетінің аға оқытушысы, педагогика ғылымдарының магистрі Бақытжан Ахметбек мазмұнды баяндама жасап, еліміздегі этносаралық қатынастардың дамуы, қоғамдық сананы жаңғырту және татулық пен келісімнің тарихи маңызына тоқталды.

«Бірлік пен тұрақтылық – кез келген қоғамның дамуының басты негізі. Қазақстан халқы Ассамблеясы осы бағыттағы ұлт пен ұлыстар арасындағы достықты, өзара сыйластық пен сенімді нығайтуда маңызды рөл атқарады», – деді Дәулет Омаров өз сөзінде.

Шараға қатысушылар пікір алмасу барысында бірлік, ұлтаралық татулық, мәдениетаралық диалог пен қоғамдық келісімге қатысты өз ойларын ортаға салды. Олар елдің өсіп-өркендеуі мен бейбіт өмір сүруі – қоғамның әр мүшесінің саналы іс-әрекеті мен өзара түсіністігіне байланысты екенін атап өтті.

«Мемлекетіміздегі тұрақтылық пен бейбіт өмірдің сақталуы – бәріміздің ортақ жауапкершілігіміз. Әсіресе, жастар арасындағы ұлтаралық сыйластық пен ұлттық құндылықтарға құрметті қалыптастыру маңызды», – деді кездесуге қатысушы жастар жетекшісі.

Жергілікті құрылым өкілдері де белсенді қатысты

Кездесу барысында аудандық ҚХА жанындағы Аналар кеңесі, Ақсақалдар кеңесі және жастар ұйымдары да өздерінің тәжірибелерімен бөлісіп, этносаралық татулықты сақтау бағытында атқарып жатқан жұмыстарымен таныстырды.

Осындай ашық форматтағы кездесулер – әртүрлі этностар арасындағы өзара түсіністікті нығайтып, ел ішіндегі тұрақтылықты сақтау жолында маңызды қадам. Бірлік – елдің ең басты байлығы. Бұл жолда әр азаматтың ойы, пікірі және ісі маңызды.