2029 жылға қарай 12 млн адам табиғи газбен қамтылады – министр

Русский перевод этой статьи пока не опубликован. Ниже — оригинал на казахском языке.

Энергетика министрі Болат Ақшолақов 2029 жылға қарай халықтың 65%-ы табиғи газбен қамтылатынын айтты, - деп хабарлайды Opennews.kz ақпарат агенттігі.

"Министрлік халықты газдандыру деңгейін 2029 жылға қарай 65%-ға дейін жеткізуді жоспарлап отыр, бұл 12 млн адамды табиғи газбен қамтамасыз етеді", - деді Ақшолақов үкімет отырысында.

Сондай-ақ энергетикалық қауіпсіздік мәселелерін күшейту үшін 2029 жылға қарай 3,7 ГВт энергия генерациялайтын қуаттар енгізіледі. Оның ішінде 1,8 ГВт электр станцияларын жаңғырту және 1,9 ГВт жаңа бу-газ қондырғыларын салу жоспарлануда.

Ал 2026 жылға қарай жаңартылатын энергия көздерінің 50-ден астам объектісі іске қосылады. Осылайша жаңартылатын энергия өндірісінің көлемі 1,5 есе өседі және ел бойынша электр энергиясының жалпы өндірісінде 7%-ға жетеді, деді министр.

Бұдан бөлек 2029 жылға дейін Ұлттық электр желісін жаңғырту, оның ішінде Батыс Қазақстанның электр желілерін Біртұтас электр энергетикалық жүйеге қосу бойынша жұмыстар жүргізіледі.