«Наурыз» ипотекасы 10% бастапқы жарнамен беріледі

2025 жылғы 3 қарашада елімізде жаңа мемлекеттік ипотекалық бағдарлама — «Наурыз» ресми түрде басталды. Бұл жоба арқылы қазақстандықтар алғашқы тұрғын үйін 10% бастапқы жарнамен және жылдық 7%-дан басталатын пайыздық мөлшерлемемен рәсімдей алады, - деп хабарлайды "Opennews.kz" ақпарат агенттігі.

Өтінімдер 2025 жылғы 3 қарашадан 1 желтоқсанға дейін қабылданады. Барлық өтініштер тек онлайн түрде Baspana Market платформасы арқылы қабылданады.

Бағдарламаға қатысу шарттары

• Тек «Отбасы банкінің» салымшылары қатыса алады;
• Депозиттегі қаражат мөлшері кемінде 2 миллион теңге болуы қажет;
• Соңғы 5 жылда өзінде немесе отбасы мүшелерінде тұрғын үй тіркелмеген азаматтар;
• 18 бен 63 жас аралығындағы Қазақстан азаматтары.
• Бастапқы жарна:
• 10% — егер жаңа пәтер таза әрлеуде болса;
• 20% — екінші нарықтағы немесе қарапайым әрлеудегі тұрғын үйлерге.

Пайыздық мөлшерлеме:

• 7% (ЖТСМ – 7,1%) — әлеуметтік осал топтарға;
• 9% (ЖТСМ – 9,4%) — басқа қатысушыларға.

Қарыздың ең жоғары сомасы:

Өңірлерде – 30 млн теңгеге дейін;

Астана мен Алматыда – 36 млн теңгеге дейін.

Несиелеу мерзімі: 19 жылға дейін.

Қай тұрғын үйді сатып алуға болады?

• Астана, Алматы және облыс орталықтарында — тек жаңа салынған тұрғын үйлер;
• Ауылдар мен моноқалаларда — жаңа және екінші нарықтағы пәтерлер.

Барлық тұрғын үй таңдау, өтінім беру және құжат рәсімдеу үдерісі Baspana Market платформасында онлайн жүргізіледі.