Несие алу қиындай ма: 11 ірі банк қатаң тексерістен өтеді

Қазақстанда 11 ірі банктің қарыз алушылардың қарыз жүктемесін қалай есептейтіні тексеріледі, - деп хабарлайды   Opennews.kz  ақпарат агенттігі.

Жаңа тұрақты бақылау аясында банктердің несие берер алдында азаматтың табысы мен бұрыннан бар қарыздарын қаншалықты дұрыс есепке алатыны бағаланады. Қарыз жүктемесінің коэффициенті адамның ай сайынғы несие төлемінің орташа табысына арақатынасын көрсетеді. Осы көрсеткіш арқылы қаржы ұйымдары клиенттің жаңа несиені төлей алу мүмкіндігін анықтайды. Әзірге тексерілетін 11 банктің атауы жарияланған жоқ.

Бұған дейін агенттік сегіз банкте сынақ тексеруін жүргізіп, олардың қарыз жүктемесін есептеу тәсілдерінде айтарлықтай айырмашылықтар бар екенін анықтаған болатын. Осыдан кейін мұндай бақылауды тұрақты түрде жүргізу туралы шешім қабылданды. Реттеуші бұл тексеру арқылы азаматтардың шамадан тыс қарыздануына жол бермеуді, көрсеткішті төмендетіп жазу жағдайларын анықтауды және банктерге ортақ есептеу тәсілін қалыптастыруды көздеп отыр.

Егер тексеру қорытындысында заң бұзушылық анықталса, агенттік тиісті бақылау шараларын қолданып, банктерден кемшіліктерді түзету жоспарын талап етеді. Сонымен қатар бұл нәтижелер алдағы уақытта қарыз жүктемесін есептеуге қойылатын талаптарды одан әрі жетілдіру үшін пайдаланылмақ.