Қазақстан Дүниежүзілік сауда ұйымының министрлік конференциясына төрағалық етіп жатыр

Русский перевод этой статьи пока не опубликован. Ниже — оригинал на казахском языке.

Женевада Дүниежүзілік сауда ұйымының 12-ші министрлік конференциясы ашылды, деп хабарлайды Opennews.kz ақпарат агенттігі  Сауда және интеграция министрлігіне сілтеме жасап. 

Осы конференцияның төрағасы және тең ұйымдастырушысы - Қазақстан Республикасы. 

Министрлік конференция – көпжақты сауда келісімдер шеңберіндегі бүкіл мәселелер бойынша шешім қабылдайтын ДСҰ-ның жоғарғы басқарушы органы. 

ДСҰ-ның 164 мүшесінің сыртқы саудасына жауапты министрлер әлемдік сауда күн тәртібінің ең өзекті проблемалары бойынша шешімдер қабылдау үшін жиналды.

 Еліміздің атынан бұл ДСҰ-ның негізгі халықаралық шарасына ҚР Президенті Әкімшілігі басшысының бірінші орынбасары Тимур Сүлейменов төрағалық етеді. 

Қазақстандық делегацияны ҚР Премьер-Министрінің орынбасары – Сауда және интеграция министрі Бақыт Сұлтанов басқарады.

 Қазақстанның МК12 төрағасы болып сайлануы - Қазақстанның халықаралық саудадағы маңызды және беделді ойыншы екенін және ДСҰ алаңында маңызды келіссөздердің негізгі қатысушысы деп танылғанын білдіреді.

 2018 жылы ДСҰ 164 мүшесі 2020 жылдың жазында Қазақстанның ел ордасы – Нұр-Сұлтанда 12-ші министрлік конференцияны өткізуді бірауыздан қолдады. 

Бұл деңгейдегі іс-шара жақында ұйымға қосылған елде және Орталық Азия елінде ДСҰ тарихында алғаш рет өткізілуі керек еді. 

Алайда, COVID-19 пандемиясына байланысты іс-шара екі рет кейінге қалдырылды және оны ДСҰ-ның Женевадағы штаб-пәтерінде өткізу туралы шешім қабылданды.

 Конференцияға қатысушылар COVID-19 пандемиясына жауап беру, ауыл шаруашылығы және әлемдік азық-түлік дағдарысын шешу, балық аулауға субсидиялар, ДСҰ-ны реформалау, электрондық сауданы одан әрі дамыту және басқа да әлемдік сауда үшін бірқатар маңызды мәселелерді қарастырады.

 Бұл іс-шара әлемдік сауда саясатындағы маңызды оқиға болып табылады және таяудағы бірнеше жылға бүкіл әлемнің сауда жүйесінің дамуын айқындайды.