Президент Тоқаев ішкі саясаттың негізгі қағидаттары мен бағыттарын бекітті

Мемлекет басшысы Қасым-Жомарт Тоқаев «Қазақстан Республикасы ішкі саясатының негізгі қағидаттары, құндылықтары мен бағыттарын бекіту туралы» Жарлыққа қол қойды, - деп хабарлайды "Opennews.kz" ақпарат агенттігі.

Құжат Ұлттық құрылтайдың IV отырысында сарапшылар мен қоғам өкілдері ұсынған бірыңғай тұжырымдамалық идея негізінде әзірленген. Президент бұл бастаманы қолдап, ішкі саясаттағы барлық жұмысты жүйелеуге бағытталған маңызды қадам екенін атап өткен болатын.

Тұжырымдаманы дайындау барысында Президент Әкімшілігі, мемлекеттік органдар, Ұлттық құрылтай мүшелері мен сарапшылар қауымы белсенді атсалысты. Негіз ретінде Мемлекет басшысының жыл сайынғы Жолдаулары, сөйлеген сөздері және Қазақстанның 2029 жылға дейінгі ұлттық даму жоспары алынды.

Құжаттың басты мақсаты – мемлекеттік органдардың ішкі саясат саласындағы қызметін үйлестіру және ортақ қағидаттарға негіздеу. Онда келесі ұстанымдар қамтылған:

• «Заң және тәртіп»
• «Халық үніне құлақ асатын мемлекет»
• «Түрлі көзқарас – біртұтас ұлт»
• «Күшті Президент – ықпалды Парламент – есеп беретін Үкімет»
• «Адал азамат»
• «Таза Қазақстан»

Сонымен қатар құжатта Ұлттық құрылтайда көтерілген жалпыұлттық құндылықтар мен ұлттық бірегейлікті айқындайтын нышандар жүйесі енгізілген.

Ішкі саясаттың басым бағыттары ретінде қоғамдық диалог, этносаралық қатынастар, дін, мәдени-гуманитарлық сала, отбасы және жастар саясаты, ақпараттық кеңістік айқындалған.

Президент қол қойған бұл тұжырымдамалық құжат енді мемлекеттік органдардың ішкі саясаттағы жұмысын ұйымдастырудың негізгі негізіне айналады.