Ереуілге шыққан кеншілер заңмен қудалануы мүмкін

Қазақстан Республикасының Еңбек және халықты әлеуметтік қорғау министрлігі «Қазақмыс» компаниясының ереуілге шыққан қызметкерлері еңбек заңнамасын бұзды деп мәлімдеді, - деп хабарлайды "Opennews.kz" ақпарат агенттігі.

Бірнеше күн бұрын «Жезқазғанцветмет» шахтасының қызметкерлері жалақыларын көтеруді талап етіп, жұмысын тоқтатқан болатын. Алайда заң бойынша, олар алдымен жұмыс берушіге ресми түрде талаптарын қойып, олардың қарастырылуын күтуі тиіс еді. Тек осыдан кейін тараптар арасында келісім болмаған жағдайда медиация комиссиясына жүгіну керек болатын.

Министрлік аталған ережелерді сақтамай өндірісті тоқтатуға болмайтынын еске салды. Мұндай әрекеттер үшін қызметкерлерге тәртіптік жауапкершілік жүктелуі мүмкін. Ведомство қызметкерлерді жұмысына қайта оралып, дауды заң аясында, медиация рәсімдері арқылы шешуге шақырды.

Еске сала кетейік, 17 желтоқсанда «Оңтүстік Қазақстан» кенішінің № 65 шахтасында кенеттен ереуіл басталды. 250-ден астам кенші жер астына түсуден бас тартты. Адамдар жалақыны көтеру және еңбек жағдайларын жақсарту қажеттілігін мәлімдеді.