Қостанай әкімі мұғалімдердің жағажайға кезекшілікке өз еркімен жазылғанын айтты

12 июня 2025, 09:00

1 625

Русский перевод этой статьи пока не опубликован. Ниже — оригинал на казахском языке.

Қостанай қаласының әкімі Марат Жүндібаев жағажайларда қауіпсіздікті арттыру мақсатында мұғалімдерді де құтқарушылармен бірге кезекшілікке шығару туралы шешімін түсіндірді,- деп хабарлайды "Opennews.kz" ақпарат агенттігі.

Облыс орталығындағы жағажайларда қауіпсіздік ережелерінің сақталуына бақылау күшейтілді. Енді құтқарушылармен бірге бұл жерде мұғалімдер де кезекшілікке шығады. Қазірдің өзінде 121 педагог кезекшілікке жазылып қойған.

Мұғалімдерді демалыста оқушыларға рейд жүргізуге шақырған Қостанай әкімі сынға қалды

"Мен бұл шешімді болған қайғылы оқиғадан кейін қабылдадым. Мұндай жағдайларды болдырмау үшін кез келген әдіс орынды. Айта кетейін, бұл жерде педагог мәртебесі туралы заң бұзылған жоқ. Себебі әрбір мұғалім, педагог немесе білім беру саласының қызметкері қосымша табыс табуға құқылы. Яғни олар жазғы лагерьлерде, мектеп жанындағы лагерьлерде жұмыс істей алатыны сияқты, осы бақылау тобында да жұмыс істей алады. Олар суға түсіп, адамдады құтқармайды, тек жағалауды аралап, жасөспірімдерді анықтап, оларды ата-аналарына немесе мектепке тапсырады. Егер мұндай жағдай қайталанса, ата-аналар әкімшілік жауапкершілікке тартылады. Желіде "Жүндібаев бізді мәжбүрлеп жатыр" деген әңгімелер тарады. Бірде-бір мұғалімге "Сен тегін жұмыс істейсің, демалысқа шықпайсың" деп мәжбүрлеген жағдай болды ма? Бізде жастар, жас педагогтар, білім қызметкерлері қосымша табыс табу үшін өз еріктерімен қатысып отыр. Бұл – қалыпты жағдай. Бұл жерде мәселе "Жүндібаев барлық мұғалімді өзенге шығарып, күндіз-түні жүруге мәжбүрлеп жатыр" дегенге тіреліп отыр. Бірақ кім мәжбүрледі? Қазірдің өзінде 121 адам өз еркімен жазылып қойды. Олардың бүкіл жазғы уақыты толық жоспарланған", – деп түйіндеді Марат Жүндібаев.