Үйдің жертөлесінен полиэтиленге оралған ер адамның сүйегі табылды

Алматының Түрксіб ауданындағы жекеменшік үйлердің бірінің жертөлесінен полиэтиленге оралған ер адамның сүйегі табылған,- деп хабарлайды Оpennews.kz ақпарат агенттігі.

Оқиға орнына жедел тергеу тобы барып, марқұм кім екенін анықтады. Алдын ала мәлімет бойынша ол тұрғын үйлерде жөндеу жұмыстарын жүргізген және қайғылы оқиға болған күні осы үйде болған.

Полиция жедел іздестіру шаралары барысында үй иесін ұстады. Оның айтуынша, ер адам әзірге нақты анықталмаған жағдайда ауыр жарақат алған. Алайда күдікті оқиға туралы құзырлы органдарға хабарламай, сүйекті жертөлеге жасырып қойған деген болжам бар.

Бұл дерек бойынша адам өліміне қатысты қылмыстық іс қозғалды. Қазір өлімнің нақты себебін анықтау үшін сот-медициналық және басқа да сараптамалар тағайындалған. Оқиғаның барлық мән-жайы тексеріліп, сотқа дейінгі тергеу жалғасып жатыр.