Жол апатынан 2 қыз қаза тапты

Алматының түнгі тыныштығын қайғылы жол апаты бұзды. Рысқұлов даңғылы мен Шәріпов көшесінің қиылысында екі көлік соқтығысып қалды, - деп хабарлайды Opennews.kz ақпарат агенттігі.

Оқиға мынадай сценариймен өрбіген. Suzuki SX4 маркалы жеңіл автокөлігі қиылыстан солға қарай бұрылмақ болады. Дәл осы сәтте оған өте қатты жылдамдықпен келе жатқан Mercedes-Benz G-класты көлігі келіп соғылған.

Соққының аса күшті болғаны соншалық шағын автокөлік жиектастан асып түсіп ондаған метрге ұшып кеткен. Ал ауыр "Гелендваген" тас жолдың бойымен тағы жетпіс метрдей сырғанап барып әрең тоқтады.Апатқа ұшыраған жеңіл көліктің ішінде төрт қыз болған екен. Рөлде отырған жүргізуші мен алдыңғы орындықтағы жолаушы жедел жәрдем жеткенше үзіліп кеткен. Артта отырған қыздардың бірін дәрігерлер бірден эвакуациялап алып кеткен.

Ал төртінші қыз қатты майысып қалған темір құрсауда қалып қойды. Құтқарушылар оны арнайы құралдардың көмегімен кесіп шығарып алған. Өкінішке қарай бұл жолаушының екі аяғы бірдей қатты езіліп қалған. Осы сұмдық жағдай кезінде жол талғамайтын көліктің ішінде болған адамдардың денсаулығы туралы ешқандай мәлімет жоқ.