14 жастағы оқушының өлімі: туыстары мектептегі дау себеп болуы мүмкін дейді

“Марқұм – Қали Қуаныш Темірбекұлы, отбасындағы алты қыздың арасындағы жалғыз ұл. Ол небәрі 14 жасында, 7-сыныпта оқып жүрген кезінде өзіне қол жұмсап, көз жұмды. Ол Қаракемер ауылындағы Әбір Нүсіпбаев атындағы №14 орта мектептің 7-сыныбында оқыды. Оқиға биыл 25 ақпанда болды. Оның өзіне қол жұмсауына мектептегі жағдай себеп болуы мүмкін”, – деп жазды марқұмның туысы.

“Сол кезде мұғалім тақтаға жазылғанды дәптерге көшіріп жазуды тапсырған. Қасында отырған сыныптасы тақтадағы жазуды көре алмай тұрғанын айтқан. Содан кейін ол телефонын алып, тақтаны суретке түсірген. Сол кезде мұғалім де суретке түсіп қалған. Мұғалім келіп, “мені түсіріп жатырсың ба?” деп сұраған. Қуаныш “жоқ, тақтаны түсірдім” деген. Сонда мұғалім “мені қанша рет фотоға түсірдің, сонша рет айыппұл саламын. 200 мың теңге төлейсің” деген. Кейін Қуанышқа түсініктеме жаздырған. Оған “айыппұл салуға қарсы емеспін” деп жазуды талап еткен. Қуаныш мұғалімнің айтқанын жазып отырған”, – дейді туыстары.

“Мұғалім “Әкеңді шақыр” деген. Қуаныш “шақырып келемін” депті. Қоңырауға бір минут қалғанда күртесін алып, мектептен жүгіріп шығып кеткен”, – дейді туыстары. Оқушыны бір сағаттан аса ешкім іздемеген

“Бір сағаттай уақыт өткен. Кейін тағы екі-үш сабақ болған. Оның ішінде басқа бір мұғалімнің және директордың сабағы болған. Бірақ ешкім Қуанышты іздемеген. Сыныптастары уайымдап, ата-анасына хабарласқысы келген, алайда оның телефонын алып қойған”, – дейді туыстары.

“Сол кезде алгебра пәнінің мұғалімі біздің үлкен әпкеміз Жансаяға телефон соққан. “Қуаныш қашып кетіпті, уайымдап тұрмын. Қайда кеткенін білмеймін. Үйіңе барсам, ешкім жоқ" деген. Біз оған “Қуаныш тығылып қалған шығар” деп айттық. Бірақ содан кейін оны іздеу жұмыстары басталмаған”, – дейді отбасы.

“Әкемнің туған ағасы біздің үйдің жанында тұрады. Ол Тарауық намазынан қайтып келе жатып, қораның есігі сәл ашық тұрғанын көрген. Есікті жабу үшін барған кезде Қуанышты асылып тұрған жерінен көрген. Не істерін білмей, көршілерді көмекке шақырған. Сол кезде Қуаныштың қайтыс болғанына екі-үш сағаттай уақыт болған деп ойлаймыз”, – дейді туыстары.

“Мектеп басшылығы мен сынып жетекшісі көңіл айтуға келді. Ал алгебра пәнінің мұғалімі жетісіне де келмеді. Кейін келіп, көңіл айтпады, кешірім де сұрамады. "Ас береміз" деді. Бірақ біз келіспедік. Біз малдан айырылып отырған жоқпыз, жалғыз бауырымыздан айырылып отырмыз”, – дейді отбасы.

“Адвокат жалдадық. Бірден бір нәрсе істейтін шығар деп ойладық. Бірақ ештеңе шешілмеді. Ал әлгі мұғалім болса, тойларға барып, өз жұмысын істеп жүрді. Кейін адвокат бізге “ештеңе істей алмаймын” деп жазды. Тіпті “мұғалім бәрін таныстары арқылы шешіп қойған сияқты” деп айтты. Біз бірнеше ай бойы сол адвокатқа сеніп жүрдік. Егер ештеңе істей алмайтын болса, мұны басында неге айтпады”, – дейді туыстары.

“Біздің ешқандай таныс-тамырымыз жоқ. Бізге әділдік керек. Малдан айырылып отырған жоқпыз, адамнан айырылып отырмыз. Бұл – алты қыздың арасындағы жалғыз бауырымыз. Қали Қуанышты Құдайдан әрең сұрап алған едік. Оның өліміне себеп болған адам тиісті жазасын алуы керек деп есептейміз”, – дейді отбасы.

“Комиссия мектепті тексерсе екен дейміз. Бұл мектепте ашылмаған қаншама мәселе бар. Тексеру келген кезде барлығын жақсы етіп көрсетеді. Мұны оқушылардың өзі де растай алады. “Жүйе” деген нәрседен қаншама бала зардап шекті. Оны да тоқтатуды сұраймыз", – дейді отбасы.

“Аталған факті бойынша қылмыстық іс қозғалды. Қазіргі уақытта оқиғаның мән-жайын анықтау үшін барлық қажетті тергеу әрекеттері жүріп жатыр”, – делінген хабарламада.