Қарағанды облыстық полиция департаменті 8 адамның өмірін қиып кеткен жол апатының негізгі себебін атады, деп хабарлайды Sputnik Қазақстан.

16 шілде күні таңғы сағат 3.20-да "Алматы-Екатеринбург" тас жолымен келе жатқан екі көлік Шет ауданында соқтығысты.

"MAN" жүк көлігі мен "Mercedes Sprinter" шағын автобусы бетпе-бет келді. Сол кезде автобус салонында 17 жолаушы отырған. Соққының қатты болғаны сонша, жеті адам оқиға орнында қайтыс болды, тағы біреуі жедел жәрдем көлігінде ауруханаға жетпей, көз жұмды.

Бұдан бөлек, тоғыз адам сан алуан дене жарақаттарымен ауруханаға жатқызылды. Облыстық полиция департаменті бастығының орынбасары Құрманғали Ысмағұловтың айтуынша, адам таситын көлік жүргізушілерінің көбісі жұмыс режимін сақтамайды. Ұйқысы қанбаса да, жолға шығып кетеді.

Жол апатында автобус жүргізушісі де, оның 17 жастағы көмекшісі де қайтыс болды.