RUB (+0.03) 7.96 KZT
USD (-1.36) 476.62 KZT
EUR (-3.40) 485.53 KZT
Қоғам
87

"Назарбаев бата берген". Жезді кентінің болашағы неге кері кетті?

Жезқазғаннан 60 шақырым жердегі Жезді кенті өз заманында елдегі ең ірі кеніштері бар елді мекен болды. Бірақ егемендік алғаннан кейін аудан тарап, Ұлытауға біріктірілген. Енді бүгінде "елес қалаға" айналып отыр, - деп хабарлайды Экспресс К

Жездіге тіпті 28 жыл бұрын Тұңғыш Президент Нұрсұлтан Назарбаев барып, батасын да берген.

Қазақстандағы ірі марганец кеніштері бар Жезді кентінің бүгінгі сиқы жайлы материалды "Сұрауы бар" бағдарламасы әзірледі. Репортажда 30 жылда тұрғын саны 5 есеге кеміген елді мекеннің "елес қалаға" айналғаны айтылады.

"Қарағанды облысы болып тұрғанда Жезқазған аймағына көңіл бөлінген жоқ. Әкімдер келсе аудан орталығына ғана соғып, кетіп қалатын. Халық шулайды. Жезқазған-Арқалық жолымен адам жүре алмайды, көрсең жылайсың. Қарағандыдан әрі қарай барыңыз — жол тақтайдай. Жезқазған жағы құдды бір Таулы Қарабақ секілді. Қазақша айтқанда "тоқалдан туған бала" болып қалғанбыз", — дейді тұрғындардың бірі Мұхамеджан Мырзабек.

Тұрғындар Жездінің бүгінгі жетім күйін, Ұлытаудың төмен әлеуетін біліксіз менеджментпен байланыстырды. Жергілікті халықтың жаңа облыс әкімі Берік Әбдіғалиұлына да кеңес-өсиеттері бар.

"Жезді ауданының өзінде 30-35 мың халық болған. Совет үкіметі құлағаннан кейін Ұлытауды көркейтеміз деп екі ауданды біріктірді. Бұл үлкен қателік болды. "Ойбай, Жездіде шахта, фабрика бар, құламайды" деп Ұлытауға қосты. Біз Арал апаты аймағына жатамыз. Сол 1992 жылы заң қабылданған кезде жеңілдіктер болатын. Зейнетақыға ақша қосылатын, оқуға, денсаулық сақтауға жеңілдіктер беретін. Қазір ол жоқ. Тек бюджеттік мекемелерде істейтіндер жалақыларына 20 пайыз қосымша алады. Ал зейнеткерлерге қарттар үйіне аудан орталығынан жолдама береді екен. Бұл мазақ қой? Мен Берік Әбдіғали депутат болып жүргенде өзіне одан да бірден о дүниеге жолдама беріңдер дегем" — дейді ардагер кенші Мұхамеджан Мырзабек.