Батыс Қазақстанда ЖРВИ-мен сырқаттану деңгейі 50,3 пайызға өсті

7 ақпан 2024, 14:35

2 553

Батыс Қазақстан облысында ЖРВИ-мен сырқаттану деңгейі өткен эпидемиялық маусыммен салыстырғанда 50,3 пайызға өсті, - деп хабарлайды "Opennews.kz" ақпарат агенттігі.

БҚО санитариялық-эпидемиологиялық бақылау департаменті басшысының орынбасары Нұрлыбек Мұстаевтың мәлім еткеніндей, 2023 жылдың 1 қазанынан бастап ЖРВИ-мен 120 678 адам ауырса, соның 77 600-і (64,3 пайызы) – 14 жасқа дейінгі балалар, 697-сі – жүкті әйелдер.

Н.Мұстаевтың сөзіне қарағанда, тұмаудың А (H3N2) түріне 81 адам шалдықса, соның 28-і – 14 жасқа дейінгілер, 23-і – жүкті әйелдер.

Сонымен қатар парагрипп, РС вирусы, аденовирус, метапневмовирус және риновирус секілді тұмау тәріздес вирустар да анықталуда.

Оған қоса жыл басынан бері бір жасқа дейінгі екі сәби көкжөтелмен сырқаттанған. Балалар арасында жиі кездесетін көкжөтел ауруы барлық ЖРВИ секілді суық тиюден басталады, содан кейін тыныс алу функциясы бұзылып, шырышты қабаттары зақымдалады. Салдарынан ұзаққа созылатын жөтел пайда болады.

«Осындай жұқпалы дерттердің таралуына жол бермеу үшін өздігінен емделмеу керек. Жедел респираторлық вирусты инфекциялардың алғашқы белгілері пайда болған кезде (қызба, бас ауруы, әлсіздік) міндетті түрде тұрғылықты жеріңіздегі медициналық мекемеге хабарласыңыз және дәрігердің барлық ұсыныстарын орындаңыз. Ауру белгілері бар, түшкіретін немесе жөтелетін адамдармен жақын қарым-қатынастан аулақ болыңыз. Бөлмені үнемі желдетіп, таза ұстаңыз. Салауатты өмір салтын ұстанып, жеткілікті ұйықтаңыз, дұрыс тамақтанып және дене шынықтырумен айналысу қажет», деді Н.Мұстаев.