АСТАНАДА FACE ID ЖӘНЕ «ЦИФРЛЫҚ ҚҰЖАТ»СЕРВИСТЕРІ АРҚЫЛЫ ПАЦИЕНТТЕРДІ 600 МЫҢНАН АСТАМ СӘЙКЕСТЕНДІРУ ЖҮРГІЗІЛДІ
Пилоттық жобаның шеңберінде Астанада медициналық ұйымдарға келген 600 мыңнан астам пациент Face ID және «Цифрлық құжат» цифрлық сервистері арқылы сәйкестендіруден өтті, - деп хабарлайды "Opennews.kz" ақпарат агенттігі.
Бүгінгі таңда пилоттық жобаға 60-тан астам медициналық ұйым қосылған, онда күн сайын 2,5 мыңнан астам медицина мамандары дәрігердің қабылдауы кезінде пациенттерді сәйкестендіруді жүргізеді.
Желтоқсан айының басында елорданың медициналық ұйымдарында қабылдаулардың жалпы саны 1 157 231-ді құрады, бұл ретте 612 мың, оның ішінде Face ID технологиясы бойынша 300 000-нан астам, «Цифрлық құжат» сервисі арқылы 311 мың сәйкестендіру жүргізілді.
Ағымдағы жылдың 11 қыркүйегінен бастап медициналық ақпараттық жүйелердің функционалына пациентті веб-камера арқылы сәйкестендіруге мүмкіндік беретін « Face ID» технологиясы қосылды.
Пациенттерге медициналық қызмет көрсетуді биометриялық растаудың бұл тетігі денсаулық сақтау жүйесіндегі бұрмаланулар мен қосып жазулар қаупімен күресте тиімді құрал болады деп күтілуде.
2025 жылдың қаңтарынан бастап жобаны бүкіл ел бойынша кезең-кезеңімен масштабтау жоспарлануда.
