Дәрігерлер әлі күнге коммуналдық шығындарға өтемақы ала алмай отыр

12 қыркүйек 2025, 12:42

2 288

Ақмола облысында ауылдық елді мекендерде жұмыс істейтін медицина, мәдениет, спорт, әлеуметтік қамсыздандыру және ветеринария саласының қызметкерлері коммуналдық қызмет пен отын үшін берілетін өтемақыны бірнеше жылдан бері ала алмай келеді. Бұл мәселе өңір депутаттары мен кәсіподақтар тарапынан бірнеше мәрте көтерілгенімен, түбегейлі шешімін табар емес, - деп хабарлайды "Opennews.kz" ақпарат агенттігі.

Заң бар – нәтиже жоқ

Қолданыстағы заңнамаға сәйкес, ауылдық жерлердегі медицина қызметкерлері мен басқа да әлеуметтік сала мамандарына жыл сайын 15 айлық есептік көрсеткіш (шамамен 59 085 теңге) көлемінде өтемақы төленуі тиіс. Бұл қаражат – коммуналдық қызметтер мен отын сатып алуға арналған әлеуметтік қолдау.

Бүгінде мұндай қолдауды ауыл мұғалімдері тұрақты түрде алып келеді. Мәселен, 2024 жылы Ақмола облысы бойынша 12 мыңға жуық педагог өтемақы алған.

Алайда сол өңірдегі дәрігерлер, мәдениет пен спорт қызметкерлері, әлеуметтік сала мамандары мен ветеринарлар бұл көмектен әлі қағылып отыр.

Қаражат бар, шешім жоқ

Облыстық мәслихаттың экономика және бюджет мәселелері жөніндегі тұрақты комиссия төрағасы Марат Қойшыбаевтың айтуынша, бұл — әлеуметтік маңызы жоғары, бірақ ұзаққа созылып кеткен мәселе.

Облыстық жұмыспен қамтуды үйлестіру және әлеуметтік бағдарламалар басқармасының басшысы Шолпан Рахматуллина түсіндіргендей, қазіргі есеп бойынша 3 119 маманға өтемақы төлеу үшін 195 млн теңге қажет. Алайда кейбір аудандар тиісті ережелерге өзгеріс енгізбегендіктен, төлем уақытылы жүзеге аспай отыр.

«Бұл – қағаз жүзінде дайын, бірақ әкімшілік шешім қабылданбай отырған мәселе», – деді Шолпан Рахматуллина.

Кәсіподақтар да дабыл қағуда

Сала қызметкерлерінің құқықтарын қорғап жүрген «SENIM» салалық кәсіподағының төрағасы Серік Какенов өтемақы төлеу облыстық бюджет есебінен жүзеге асады деп мақұлданғанын жеткізді.

«Бар болғаны – адам басына 59 мың теңге. Тек 2 200 дәрігерге төлеудің өзі – ауыл үшін үлкен көмек. Қаражат көлемі үлкен емес, бірақ маңызы зор», – дейді Серік Какенов.

Кадр жетіспеушілігіне себеп болуы мүмкін

Ақмола облыстық кәсіподақтар орталығының өкілі Болат Жупиновтың пікірінше, бұл мәселе ауылдық медицина кадрларын ұстап қалуға тікелей әсер етеді.

«Біз екі жылда 38 денсаулық сақтау нысанын саламыз деп отырмыз. Бірақ онда кім жұмыс істейді? Егер қолдау болмаса, кадр да болмайды. Бұл – адам капиталын дамыту мәселесі», – деді ол.

Қаржы қайта бөлінуі мүмкін

Облыстық экономика және бюджеттік жоспарлау басқармасы басшысының орынбасары Азамат Ібікенов өтемақы төлеу үшін қажетті қаражатты қарастырып жатқанын айтты.

«Қазір үнемделген қаржы бар, оның аясында 195 млн теңгені қайта бөлу жолдары қарастырылуда. Бірақ нақты шешім әлі қабылданған жоқ», – деді ол.

Ақмола облысында ауылдық мамандардың еңбегін бағалау мен оларды әлеуметтік қолдау мәселесі нақты әрекетті қажет етеді. Жылыту маусымы жақындап келеді. Ал әлеуметтік сала қызметкерлері қарапайым өтемақыны күтіп отыр. Мәселенің уақытында шешілуі – тек адамдардың тұрмыс сапасына ғана емес, ауылдағы өмір сапасына, кадр тұрақтылығына және мемлекеттік қызметтердің қолжетімділігіне де тікелей ықпал ететіні сөзсіз.