Қазақстанға келетін медициналық туристер саны бес есе артты
2021 жылдан бері Қазақстанға емделу үшін келетін шетелдік туристер саны бес есеге өсті. Денсаулық сақтау министрлігінің мәліметінше, бұл АҚШ пен Батыс Еуропамен салыстырғанда медициналық қызметтердің 5–10 есе арзан болуымен байланысты, - деп хабарлайды "Opennews.kz" ақпарат агенттігі.
Медициналық туристер көбіне Қытай, Үндістан, Түркия, Еуропа, АҚШ және Орталық Азия елдерінен келеді. Олар кардиохирургия, онкология, стоматология, нейрохирургия, офтальмология және тексеру (чек-ап) қызметтеріне сұраныс білдіреді.
Маман Гүлнәр Сәрсенбаеваның айтуынша, шетелдіктер көбіне Joint Commission International (JCI) аккредитациясынан өткен жетекші ұлттық және өңірлік клиникаларды таңдайды.
Қазақстан медицинасы соңғы жылдары протондық терапия, гамма-пышақ, робот көмегімен жасалатын операциялар және цифрлық диагностика сияқты заманауи технологияларды енгізіп, Орталық Азияда медициналық инновация бойынша көшбасшы елге айналды.
Бүгінде шетелдік науқастар жиі жүгінетін мекемелердің қатарында:
- University Medical Center (UMC);
- Ұлттық нейрохирургия орталығы;
- Кардиология және ішкі аурулар ғылыми-зерттеу институты;
- Ұлттық балаларды оңалту орталығы;
- Президент Іс Басқармасы Медициналық орталығының ауруханалары және «Үміт» онкологиялық орталығы.
