Екі ел арасындағы қақтығысқа нүкте қойылды

Ауғанстан мен Пәкістан Қатар астанасы Дохада өткен келіссөзде екі ел арасындағы шайқасты дереу тоқтату жөнінде шешімге келді,-деп хабарлайды "Opennews'' ақпарат агенттігі.

Екі ел арасындағы бір аптаға созылған қанды қақтығысқа нүкте қойылды. Нәтижесінде шекара бойындағы шабуыл салдарынан ондаған адам қаза тауып, жүздеген тұрғын жараланған болатын — бұл соңғы жылдардағы ең ауыр шиеленіс деп бағаланып отыр. 

Қатар тарабының мәліметінше, тараптар тұрақты бейбітшілікті қамтамасыз етуге бағытталған арнайы механизмдер құрып, алдағы күндері қосымша келіссөздер өткізуді жоспарлауда. Сондай-ақ бұл процесте түрік дипломаттары да қолдау көрсеткен. 

Айта кетейік, екі елді 2600 шақырымдық Дюранд сызығы бөліп тұр. Алайда Ауғанстан бұл шекараны тарихи әділетсіз деп санап, мойындамай келеді. Шекара мәселесі ғасырдан астам уақыт бойы екі мемлекет арасындағы ең күрделі даулардың бірі деп саналуда.