Әкімнің үйінде пеш түсіремін деп саусағынан айырылған оқушыға ота жасалды

Ақтөбе облысының Құмтоғай ауылында 11-сынып оқушысы ауыл әкімінің үйіне жеткізілген темір пешті түсіруге көмектесіп жүріп жарақат алды, - деп хабарлайды  Opennews.kz  ақпарат агенттігі.

Дәрігерлер баланың зақымданған саусағының бір бөлігін кесуге мәжбүр болған.

Оқиға 8 қазанда Ырғыз ауданына қарасты ауылда болған. Зардап шеккен баланың анасы Гүлзира Өксікбаева ұлының жарақат алғаны туралы бірден хабар алмағанын айтады. Оның сөзінше, баласы әкімнің ауласында есінен танып, кейін қызметтік көліктің ішінде есін жиған.

Анасы алғашқы медициналық көмектің қалай көрсетілгеніне және оқиғадан кейін баласының жағдайын ешкім сұрамағанына наразылығын білдірді.

Ал ауыл әкімі Мұрат Санымбаев оқиғаны растады. Оның айтуынша, жасөспірім үйіне туысының баласымен бірге келген. Пешті түсіру кезінде оқушының қолын ауыр зат басып қалған. Әкім алғашқы көмекті ауыл дәрігері көрсеткенін, баланы кейін ауруханаға жеткізгенін мәлімдеді.

Аурухана мамандарының хабарлауынша, тексеруден кейін оқушыға ота жасалып, медициналық көрсетілім бойынша саусағының бір бөлігі кесілген.

Мектеп басшылығы оқиға туралы келесі күні ғана білген. Жасөспірім сабаққа келмеген соң, мектеп қызметкерлері ата-анасымен байланысқан.

Оқушының ауыр пешті түсіруге қатысуына кім жауапты? Мұндай жағдайда баланың қауіпсіздігі қалай қамтамасыз етілуі керек?

Оқиғаның мән-жайы мен жауапкершілік мәселесі тиісті органдар тарапынан анықталуы маңызды.