Нұр-Сұлтан Париждің Орталық Азиядағы алғашқы серіктесі болды

Нұр-Сұлтан француз астанасының Орталық Азиядағы алғашқы серіктесі болды,- деп хабарлайды Opennews.kz ақпарат агенттігі Хабар 24 арнасына сілтеме жасап.

Парижде қос қала әкімшілігі ынтымақтастық туралы келісімге қол қойды. Париж әкімшілігі тығыз қарым-қатынас орнатып, тәжірибе алмасуға ниетті. Сапар барысында Нұр-Сұлтан қаласының делегациясы француз бизнесмендерімен кездесіп, мәдени байланыс туралы келіссөз өткізді. Келесі жылы Париж музейлерінің көрмесін ұйымдастырып, өзге де жобаларды жүзеге асыру қарастырылып жатыр.

Арно Нгатча, Париж мэрінің орынбасары:  

- Біз Париж пен Нұр-Сұлтан арасындағы мәдени байланысты байытпақ ниеттеміз. Осы ретте қазіргі ынтымақтастық туралы құжаттың мәні зор. Бұл қос шаһардың арасындағы қарым-қатынасты нығайта түседі. 

Алтай Көлгінов, Нұр-Сұлтан қаласының әкімі:

- Әрбір қаланың өз тарихы, салт-дәстүрі, тәжірибесі бар. Париждің тарихы терең. Бірақ әлем бір орында тұрмайды. Тараптар түрлі саладағы мол тәжірибесімен алмасып, серіктестік екі жаққа да тиімді болатынына сенімдімін.