Қазақстан президентінің қандай өкілеттіктері қысқарады
294
Ұлттық экономика министрі Әлібек Қуантыров суперпрезиденттік басқару формасынан бас тарту аясында президенттің қандай өкілеттіктері қысқаратынын айтты, - деп хабарлайды Opennews.kz ақпарат агенттігі Stan.kz ақпарат агенттігіне сілтеме жасап.
Президенттің саяси реформалар жайлы жолдауын іске асыру жөнінде Жалпыұлттық іс-шаралар жоспары әзірленді. Құжатта "Президенттің өкілеттіктері туралы" бірінші бағыт бойынша 3 іс-шараны іске асыру көзделген.
"Президент өкілеттіктерін шамадан тыс шоғырландырудан бас тарту мақсатында заңнамаға бірқатар түзету енгізіледі", - деді Қуантыров үкімет отырысында.
Олар:
- президенттің өз өкілеттіктерін атқаруы кезінде саяси партияға мүшелігін тоқтату;
- президенттің жақын туыстарының мемлекеттік саяси қызметшілер мен квазимемлекеттік сектор кәсіпорындары басшысы лауазымын атқаруына тыйым салу;
- президенттің облыс, республикалық маңызы бар қала және астана әкімдері актілерінің күшін жою немесе оларды тоқтата тұру жөніндегі құзыретін алып тастау;
- аудан, облыстық маңызы бар қала, аудандық маңызы бар қала, ауыл, кент, ауылдық округ әкімдерін лауазымынан босату құқығын жою.
Сондай-ақ әкімдер мен олардың орынбасарларына саяси партиялардың филиалдарында қызмет атқаруға тыйым салынады.
