Қазақстанның бірнеше елдегі елшісі тағайындады

364
Мемлекет басшысы Қасым-Жомарт Тоқаевтың жарлығымен еліміздің Қырғызстандағы, Үндістандағы және Бельгиядағы жаңа елшісі тағайындалды.

Президент жарлығымен Қайрат Айтмұхамбетұлы Нұрпейісов Қазақстан Республикасының Қырғыз Республикасындағы Төтенше және Өкілетті Елшісі лауазымынан босатылды. Оның орнына Рәпіл Сейітханұлы Жошыбаев тағайындалды. Сонымен қатар Нұрлан Әділұлы Жалғасбаев Қазақстан Республикасының Үндістан Республикасындағы Төтенше және Өкілетті Елшісі лауазымына тағайындалды.

Бұл қызметте ол Ерлан Алтынбайұлы Әлімбаевты алмастырды. Сондай-ақ Ерлан Әлімбаев Қазақстан Республикасының Шри-Ланка Демократиялық Социалистік Республикасындағы, Бангладеш Халық Республикасындағы, Непал Федеративтік Демократиялық Республикасындағы, Бутан Корольдігіндегі, Мальдив Республикасындағы Төтенше және Өкілетті Елшісі лауазымын қоса атқарудан босатылды. 

Одан бөлек, Марғұлан Бақытұлы Баймұхан Қазақстан Республикасының Бельгия Корольдігіндегі Төтенше және Өкілетті Елшісі лауазымына, Еуропа Одағының жанындағы және Солтүстік Атлант Шарты ұйымындағы (НАТО) Қазақстан Республикасы Өкілдігінің Басшысы лауазымына тағайындалды.