Екі озат оқушы Малайзиядағы халықаралық мектептің грантын жеңіп алды

26 ноября 2025, 10:02

2 522

Русский перевод этой статьи пока не опубликован. Ниже — оригинал на казахском языке.

Талғар қаласындағы №7 мектеп-лицейінің 4-сынып оқушылары Аңсар Сарқытбек пен Айша Назар халықаралық грант иегері атанды. Олар Малайзияның Куала-Лумпур қаласында Cambridge бағдарламасымен білім беретін халықаралық мектепте оқу құқығына ие болды,-деп хабарлайды Opennews.kz ақпарат агенттігі.

Алматы облысы әкімдігінің мәліметінше, іріктеу тестілеуі кезінде екі оқушы да жоғары деңгейдегі дайындықтарын көрсеткен. Нәтижесінде Аңсар мен Айша 2026 жылдың 5 қаңтарынан бастап 4-сыныптың екінші жартыжылдығын Малайзиядағы халықаралық мектепте жалғастырады. Оқушылардың оқу ақысы толық көлемде грант есебінен өтеледі.

– Қуанышты жаңалықты мектеп ұжымы ерекше ықыласпен қабылдап, жас дарындарды және олардың ұстаздарын құттықтады. Шетелде білім алу оқушылардың болашақтағы жетістіктеріне жол ашып, жаңа халықаралық мүмкіндіктерге бастау болмақ, – деп атап өтті облыс әкімдігі.

Мамандардың айтуынша, бұл грант жас таланттарға әлемдік деңгейде білім алуға мүмкіндік беріп, олардың кәсіби әрі тұлғалық дамуына серпін береді деп күтілуде.