ҚЫЗЫЛША АУРУЫНЫҢ АЛДЫН АЛУДА - ЕКПЕ ЕГУДІҢ МАҢЫЗЫ ЗОР

7 ноября 2023, 12:39

2 526

Русский перевод этой статьи пока не опубликован. Ниже — оригинал на казахском языке.

Облыста 6 қарашадан бастап 1 жасқа толмаған балаларға қызылшаға қарсы қосымша иммундау жұмыстары жүргізіледі,- деп хабарлайды "Opennews.kz" ақпарат агенттігі.

Ал 2-4 жас аралығындағы балаларға екпе егу жұмыстары 5-ші желтоқсанда басталады. Бұл туралы Өңірлік коммуникациялар қызметінің ақпарат алаңында облыстық санитариялық-эпидемиологиялық бақылау департаменті басшысының орынбасары Әлия Әбдіқайымова хабарлады.

"Қызылша індетіне шалдыққандардың басым бөлігі - ауруға қарсы екпе алмаған жандар. Сондай-ақ, уақытылы вакцинацияланбаған балалар қызылшаға жиі шалдығады. Осыған сәйкес, қызылша ауруының эпидемиологиялық ахуалын тұрақтандыру үшін қажетті шаралар қолға алынды. Қазақстанның Бас санитариялық дәрігерiнiң қаулысына сәйкес, қызылшамен ауырған науқаспен байланыста болған 30 жасқа дейінгі адамдар шұғыл вакцинацияланады және медициналық бақылауға алынады.
Сонымен қатар тұрақты тіркелмеген, қызылшаға қарсы егілу дерегі жоқ азаматтар келісім бойынша бір рет иммундалады. Қызылшаға қарсы егілмеген 55 жасқа дейінгі медицина қызметкерлері де екпе алады. Бұдан бөлек, халық арасында ақпараттық түсіндірме жүргізіледі.", - деді Әлия Мүтәліпқызы.

Облыстық жұқпалы аурулар ауруханасының бас дәрігері Айна Мұхамбетова қызылша ауруының белгілеріне тоқталып өтті.

"Қызылша – кең таралған инфекциялық ауру. Көбіне қызылша балалар арасында кездеседі. Аурудың белгілері - дене қызуының көтерілуі, мұрынның, көздің және тамақтың шырышты қабығы қабынады және теріде бөртпелер пайда болады. Бұл инфекция ауа арқылы беріледі. Сондықтан аурудың алдын алып, уақытылы екпе қабылдаған жөн.", - деді Айна Қарабұзауқызы.

Айта кетейік, жыл басынан бері облыста қызылша ауруының 708 дерегі тіркелсе, оның 611-і 14 жасқа дейінгі балалар арасында анықталды. Ал 1 жасқа толмаған нәрестелер арасында 163 жағдай орын алған.