«Дәрігерге жеткізіп үлгермедік»: Атырауда 6 айлық сәби көз жұмды

Атырауда 6 айлық сәби облыстық балалар ауруханасының табалдырығында көз жұмған. Ата-анасы дер кезінде диагноз қойылмағанын және санитарлық авиация берілмегенін мәлімдеген. Оқиға бойынша тексеру жүріп жатыр,- деп хабарлайды Оpennews.kz ақпарат порталы Baq.kz сайтына сілтеме жасап.

Ата-анасының айтуынша, олар науқас баланы Қызылқоға ауданынан Атырау қаласына медициналық көмек алу үшін жеткізбек болған. Ауылда сәбиге ұзақ уақыт нақты диагноз қойылмай, тиісті ем тағайындалмаған. Кейін оның құлақ қабынуы (отит) болғаны анықталған.

Ата-аналар санитарлық авиация шақыруды сұрағандарын, алайда бұл өтініштің қанағаттандырылмағанын айтады.

Содан кейін баланы жедел жәрдем көлігімен Атырауға жеткізу туралы шешім қабылданған. Бірнеше сағатқа созылған жол барысында сәбидің жағдайы күрт нашарлаған.

Атырау облыстық Денсаулық сақтау басқармасының мәліметінше, аталған факті бойынша тексеру жүргізіліп жатыр. Сәбидің денесі сот-медициналық сараптамаға жіберілген.

Басқарма басшысы Қайсар Абдалиевтің айтуынша, медицина қызметкерлерінің әрекетіне құқықтық баға сараптама қорытындысынан кейін ғана беріледі. Сондай-ақ қылмыстық іс қозғау мәселесі де сол қорытындыға сәйкес шешіледі.