Жаңақорғанда санитарлық тазалық жұмыстарына мониторинг жүргізілді

18 июля 2025, 10:59

2 376

Русский перевод этой статьи пока не опубликован. Ниже — оригинал на казахском языке.

Бүгін аудан әкімінің орынбасары Бектас Нуридиновтің жетекшілігімен Жаңақорған кенті орталығындағы «Нұр» базарына санитарлық талаптардың сақталуына байланысты мониторинг жүргізілді, - деп хабарлайды "Opennews.kz" ақпарат агенттігі.

Мониторинг жұмыстарына кент әкімдігі, аудандық кәсіпкерлік бөлімі, санитарлық-эпидемиологиялық бақылау басқармасы, полиция бөлімі мен төтенше жағдайлар бөлімінің өкілдері қатысты.

Алдымен базар ішіндегі ет өнімдерін сату қатары мен қоғамдық тамақтану орындары қаралып, тазалық талаптарының жай-күйі тексерілді. Аудан әкімінің орынбасары базар басшысына ет өнімдерінің арнайы жабынмен қорғалуы тиіс екендігін және тамақтану орындарында санитарлық нормалардың орындалмауын атап өтті.

– Базарлар мен сауда нүктелері тұрғындар көп жиналатын орын болғандықтан, санитарлық жағдай барлық талаптарға толық сай болуы қажет. Әрбір кәсіп иесі өзінің жұмыс орнын таза ұстауға міндетті, – деді Бектас Балғабайұлы.

Сондай-ақ, базар маңындағы дүңгіршек иелеріне ескірген жарнамалық баннерлерді жаңарту қажеттілігі ескертілді.

Мониторинг нәтижесінде анықталған кемшіліктер бойынша аудандық санитарлық-эпидемиологиялық бақылау және төтенше жағдайлар бөлімдерінің бақылау функцияларын күшейту тапсырылды. Сонымен қатар, кент әкімдігіне базар маңындағы санитарлық тазалық жұмыстарын тұрақты бақылауда ұстау жүктелді.