Сырдария ауданында интернет алаяқтармен күресу жүргізілуде

Сырдария ауданының полиция бөлімі бастығының міндетін атқарушысы, полиция подполковнигі Әділхан Қанзадаев аудан бойынша алаяқтық қылмысының, оның ішінде интернет алаяқтық қылмысының алдын алу туралы айтып берді, - деп хабарлайды "Opennews.kz" ақпарат агенттігі Kyzylorda-news.kz сайтына сілтеме жасап.

Әділхан Серікқазыұлы өз сөзінде бүгінгі күні елімізде қарқынды белең алып келе жатқан «Интернет алаяқтық» қылмыстарының жәй-күйіне тоқталды.

Одан әрі Әділхан Серікқазыұлы интернет-алаяқтардың алаяқтардан айырмашылығы туралы айтты. Яғни интернет-алаяқтарды анықтап жауапкершілікке тарту әлде қайда қиын. Себебі олардың кім екені, қайда екені белгісіз, ал шет елдерде жұмыс істейтін қылмыскерлерді табу тіпті қиын. Ал осының барлығын анықтау жұмыстары, ұзақ уақытқа созылатын тергеу амалдарын талап етеді.

Әдетте алаяқтар жәбірленушілерді сауда-саттықтағы жалған жеңілдіктермен, қаржыны тым жоғары пайызбен еселеп берумен, тауарын тиімді шарттармен сатып алумен қызықтырады. Сондай-ақ полиция қызметкерлерінің атын жамылып, жақын туысының есірткі затымен ұсталып тұрағынын айтып қаржы бопсалайды, кей жағдайда өздерін банк қызметкері ретінде таныстырып, дербес деректерін заңсыз иемдену арқылы қаражат жымқырады немесе бөтеннің атынан онлайн-несиелер рәсімдеп жатады.

Бұған қоса, аудан тұрғындарына әлеуметтік желілер мен бұқаралық ақпарат құралдары арқылы алаяқтардың  арбауына түсіп қалмау жайлы түсіндірмелік мақалалар мен бейнероликтер жарияланып, сақтық шаралары ескертіліп келеді.

Интернет алаяқтарға тосқауыл қоюдың бір ғана жолы – бұл бір бірімізге жанашырлық танытып, қаражатымыздың қауіпсіз сақталуы үшін сақтық шаралары туралы кеңінен насихаттап, жұртшылыққа ескерту болып табылады.