Үйдің кіреберісіне кір жайғаны үшін 78 640 теңге айыппұл салынды

Ақтауда үйдің кіреберісіне жуылған киімдерін іліп қойған әйелге хаттама толтырылды, - деп хабарлайды "Opennews.kz" ақпарат агенттігі.

Ақтауда 32 Б ықшам ауданы, 8-үйдің тұрғыны кірді кіреберіске жайып қойғаны үшін жазаланды. Киімдердің арасында тіпті әйелдердің іш киімі де болды. Әйелге Әкімшілік құқықбұзушылық туралы кодекстің 505-бабы “Қалалар мен елді мекендердің аумақтарын абаттандыру ережелерін бұзу” бойынша хаттама толтырылды.

Кір жаю – қалалар мен елді мекендердің аумақтарын абаттандыру ережелерін бұзу болып табылады. Бапта жеке тұлғаларға ескерту немесе 20 АЕК (78 640 теңге) айыппұл салу қарастырылған.