Өртенген үйден әйел мен екі ер адамның денесі табылды

Солтүстік Қазақстан облысында үш адамның жұмбақ өліміне байланысты тергеу жүргізіліп жатыр. Полтавка ауылындағы өртеніп кеткен үйдің орнынан үй иесі мен екі ер адамның денелері табылды. Тек қаза болған әйелдің қызы ғана аман қалған, - деп хабарлайды "Opennews.kz" ақпарат агенттігі.

Өрт Полтавканың шетінде кешкісін тұтанған. 13 шақырым жердегі өрт сөндіру бөлімінен жеткен кезде үйді ашық жалын шарпып тұрған. Қираған үйдің орнынан 58 жастағы үй иесінің және 44 пен 46 жастағы екі ер адамның денесі табылды. 

Белгілі болғандай, ер адамдардың бірі оқиға кезінде қонақта болған, ал екіншісі – қаза тапқан әйелдің қызының азаматтық некедегі жары. Өрт кезінде 35 жастағы әйел үйден шығып үлгерген.

Ауыл тұрғындары бұл әулетті тату, үлгілі отбасы ретінде сипаттайды. Екі ер адам да жергілікті ЖШС-де жұмыс істеген. Үй иесі үй шаруасымен айналысқан.

Солтүстік Қазақстан облысы тергеу басқармасының басшысы Азат Құсаиновтың мәліметінше, үшеуі қылмыстың құрбаны болуы мүмкін.