Стюардессадан тізерлеп кешірім сұратқан жолаушы өмір бойы ұша алмайтын болды

Қытайда жолаушы стюардессаны тізерлеп кешірім сұрауға мәжбүрледі, - деп хабарлайды Opennews.kz  ақпарат агенттігі.

China Eastern Airlines әуе компаниясының Хэфэй – Далянь бағытындағы рейсінде төтенше оқиға орын алды. Бортсерік қызметтік арбашамен ұйықтап жатқан жолаушының шынтағына байқаусызда тиіп кеткен. Бұған жауап ретінде ер адам агрессия көрсетіп, қызметкерді көпшіліктің көзінше тізерлеп кешірім сұрауға мәжбүрлеген.

Ұшақ қонғаннан кейін медициналық тексеріс жолаушының ешқандай жарақат алмағанын көрсетті. Әуе компаниясы өз қызметкерін толықтай қолдап, борттағы тәртіпті бұзғаны және жеке қадір-қасиетті қорлағаны үшін полицияға арыз түсірді.

Қазіргі уақытта заң бұзушы әуе компаниясының "қара тізіміне" өмірлікке енгізіліп, оған рейстерге ұшуға тыйым салынды.