Қаз
Рус
Маңғыстаулық жігіт әйелімен ажырасқан соң, берген 1 615 000 теңге қалыңмалын қайтаруды талап еткен
431
Русский перевод этой статьи пока не опубликован. Ниже — оригинал на казахском языке.
Маңғыстау облысында екі жыл некеде болған ер адам ажырасуға арыз беріп, әйелі мен оның туыстарынан қалыңмалды қайтаруды талап етті- деп хабарлайды Opennews.kz ақпарат агенттігі Lada.kz. порталына сілтеме жасап.
Облыс сотының баспасөз қызметінің ақпаратынша, арызданушы бұрынғы қалыңдығы мен оның ата-анасынан 800 000 теңгені, гауһартастармен көмкерілген алтын бұйымдарды, екі кілем мен қалыңмал ретінде берілген 1 615 000 теңгені өндіру туралы талап арызбен сотқа жүгінген.
Дегенмен ол жауапкерлердің мүліктік зиян келтіргені немесе қандай да бір міндеттеме алғаны туралы дәлел ұсынбаған.
"Қазақтың салт-дәстүрі бойынша жастар некеге тұрғанда олардың ата-анасы арасында ескі әдет-ғұрыптар жасалады, ал берілген заттарды қайтару талабы қолданыстағы заңнамамен реттелмеген, яғни тараптар арасында ерікті түрде берілген дүние-мүлікті қайтарып алуға қатысты ешқандай міндеттеме жоқ", – деп түсіндірді сот.
Сот ер адамның талап арызын қанағаттандырудан бас тартты.
Дегенмен ол апелляцияға шағым түсіріп, сотқа берілген талап-арыз бойынша жаңа шешім шығаруды, куәларды шақырып, олардан жауап алуды сұрады.
Сот алқасы апелляциялық шағымды қанағаттандырмады, сот шешімі өзгеріссіз қалды.
Бұл іс бойынша үкімді 1 қарашада Маңғыстау облысы сотының баспасөз қызметі жариялады.
