Қытайдағы жазғы универсиадада Қазақстан медальдар кестесінде 10-орынға табан тіреді

Қытайдың Чэнду қаласында өтіп жатқан ХХХІ Жазғы универсиадасының медальдар кестесінде ел құрамасы 10-орынға көтерілді, - деп хабарлайды "Opennews.kz" ақпарат агенттігі.

Қазір отандастарымыздың еншісінде 11 медаль бар. Оның бірі – алтын, бесеуі – күміс, бесеуі – қола.

Медальдар кестесінде қазақстандық спортшылар 14-орыннан 10-орынға көтерілді. Көш басында 28 (17-6-5) медальмен Қытай келеді. Одан кейінгі орындардағы Оңтүстік Кореяның – 28 (13-10-5) Жапонияның 25 (11-7-7) медалі бар.

Жазғы универсиаданың үшінші жарыс күні, 31 шілдеде Қазақстан 6 медаль алды.

Атап айтқанда, таеквондошы Рита Бакишева (48 келі) дүниежүзілік доданың жеңіс тұғырына көтерілді.

Ал Диана Тұрсынбек (садақ ату) екінші орыннан көрінді.

Көркем гимнастикадан Елжан Таниева екі күміс (доп пен лентамен өнер көрсету), бір қола (құрсаумен сайыс) алды.

Ел құрамасынан винтовкамен 10 метр қашықтықта оқ ату сайысында Константин Малиновский, Ислам Сәтпаев және Никита Шахторин қола жүлде иеленді.