Қаз
Рус
Қазақ балуаны жасөспірімдер арасында әлем чемпионы атанды
Русский перевод этой статьи пока не опубликован. Ниже — оригинал на казахском языке.
Грек-рим күресінен Қазақстан жасөспірімдер құрамасының өкілі Жаңажол Қуанышбек Афинада (Грекия) өтіп жатқан U17 әлем чемпионатында алтын медаль жеңіп алды, - деп хабарлайды "Opennews.kz" ақпарат агенттігі.
Қазақстандық балуан 45 келіге дейінгі салмақ дәрежесінде топ жарды. ҚР ҰОК мәліметінше, финалдық белдесуде Қуанышбек Қырғызстаннан барған Нуркерим Кумарбековті жеңді.
Жаңажол Астана қаласындағы «Күрес түрлері бойынша олимпиадалық даярлау орталығы» РМҚК Жақсылық Үшкемпіров атындағы жекпе-жек сарайында тәлім алып жүр. Спортшыны жарысқа аға жаттықтырушы Асхат Жанбиров пен жаттықтырушы Жарқын Тұрсынов дайындады.
Бұған дейін Нұрдәулет Құмарұлы (48 келіге дейін) мен Нұралы Асқар (55 келіге дейін) күміс медаль иеленсе, Шамиль Досбол (65 келіге дейін) қола жүлдегер атанды.
