Рафаэль Уразбахтин "Қайрат" футбол клубының бас бапкері қызметінен кетті

Сегодня, 09:30

2 502

Русский перевод этой статьи пока не опубликован. Ниже — оригинал на казахском языке.

"Қайрат" футбол клубының бас бапкері Рафаэль Уразбахтин өз еркімен қызметінен кетті,- деп хабарлайды Оpennews.kz ақпарат агенттігі.

Рафаэль Уразбахтин клуб басшылығына өз еркімен қызметінен кету туралы өтініш берген. Клуб басшылығы оның шешімін қабылдап, өтінішін қанағаттандырды.

“Рафаэль Радикович 2024 жылғы қыркүйекте негізгі команданың бас бапкері атанып, алғашқы маусымының қорытындысы бойынша сары-қараларды Қазақстан чемпионы атандырды. 2025 жылы оның жетекшілігімен "Қайрат" Қазақстан Суперкубогын жеңіп алып, чемпиондық атағын қорғады және клуб тарихында алғаш рет УЕФА Чемпиондар лигасының жалпы кезеңіне жолдама алды”, – делінген “Қайрат” ФК баспасөз қызметі таратқан ақпаратта.

Бас бапкердің міндетін бұған дейін "Қайрат-Жастарды" басқарған Жора Арутюнян атқарады. Оның жетекшілігімен команда "Алтайға" қарсы алдағы матчқа дайындалмақ.

"Қайрат" футбол клубы Рафаэль Уразбахтинге атқарған жұмысы, кәсібилігі, клуб тарихына қосқан үлесі алғыс айтты.

Еске салсақ, бұған дейін "Ордабасы" футбол клубы мерзімінен бұрын Қазақстан чемпионы атанғаны туралы жазған едік.

25 қазанда Ақтөбедегі Орталық стадионда өткен "Ақтөбе" мен "Қайрат" футбол клубтары арасындағы кездесу 2:2 есебімен аяқталды.

Бұл нәтиже алматылық клубты чемпиондық мүмкіндігінен айырды. Маусымның аяқталуына бір тур қалғанда "Қайраттың" еншісінде 64 ұпай болса, "Ордабасы" 68 ұпай жинаған. Осылайша, шымкенттік команда ең жақын қарсыласынан ұпай саны бойынша озып, чемпиондық атақты мерзімінен бұрын қамтамасыз етті.