Шиеліде газдандыру жұмыстары қарқын алуда: Аудан әкімі құрылыс барысымен танысты
Аудан әкімі Айтбай Жандарбеков Шиелі ауданына қарасты Жансейт және 21-бекет елді мекендеріндегі газдандыру жұмыстарының барысымен танысып, ауыл ардагерлерімен кездесу өткізді, - деп хабарлайды "Opennews.kz" ақпарат агенттігі.
Құрылыс барысы – бақылауда
Аудан басшысы аталған ауылдарда жүргізіліп жатқан табиғи газ тарту жұмыстарының сапасына ерекше мән беріп, мердігер мекемелер мен техникалық қадағалау өкілдеріне нақты тапсырмалар жүктеді. Газ желілерінің сапалы әрі уақтылы тартылуы —тұрғындардың өмір сүру сапасын арттыруға бағытталған маңызды қадам екені атап өтілді.
Ауыл халқының алғысы мен ұсыныстары
Кездесу барысында ауыл тұрғындары мен ардагерлер өз ұсыныс-пікірлерін білдіріп, ел игілігі үшін жасалып жатқан бұл жобаларға ризашылықтарын жеткізді. Ауыл халқы үшін табиғи газға қосылу — тұрмыс жеңілдігін қамтамасыз етіп қана қоймай, экологиялық әрі экономикалық тұрғыдан тиімді шешім болмақ.
Жобалар туралы толық мәлімет
21-бекет елді мекені
Тапсырыс беруші: «Шиелі ауданының құрылыс, сәулет және қала құрылысы бөлімі»
Жеңімпаз мердігер: «Орда сервис-2020» ЖШС
Шарт сомасы: 280,4 млн теңге
Техникалық қадағалаушы: «АМАН-ЕР и К» ЖШС
Жансейт елді мекені
Тапсырыс беруші: «Шиелі ауданының құрылыс, сәулет және қала құрылысы бөлімі»
Жеңімпаз мердігер: «Аксар Строй» ЖШС
Шарт сомасы: 176,0 млн теңге
Техникалық қадағалаушы: «АМАН-ЕР и К» ЖШС
Газдандыру – халық игілігіне қызмет
Бүгінгі таңда Шиелі ауданы бойынша елді мекендерді газдандыру деңгейі халық санына шаққанда 79,7%-ды құрайды. Бұл көрсеткіш жыл санап артып келеді.
Газдандыру жұмыстарының нәтижесінде:
- Ауыл тұрғындарының тұрмыс деңгейі жақсарады;
- Қатты отынға тәуелділік азаяды;
- Экологиялық қауіпсіздік артады;
- Ауылдардың инженерлік инфрақұрылымы жаңарып, әлеуметтік-экономикалық даму деңгейі көтеріледі.
Аудан әкімі Айтбай Жандарбековтің айтуынша, газдандыру – тұрғындардың өмір сапасын арттырумен қатар, елді мекендердің келешегін айқындайтын маңызды бағыттардың бірі. Бұл бағыттағы жұмыстар алдағы уақытта да жүйелі түрде жалғасатын болады.
